बुलिङटार १० चैत । बिजय लघुवित्त वित्तीय संस्था लिमिटेड, शाखा कार्यालय बुलिङटारले एक दिने वित्तीय साक्षरता कार्यक्रम सफलतापूर्वक सम्पन्न गरेको छ ।
यस कार्यक्रमको उद्देश्य स्थानीय नागरिकहरूलाई वित्तीय ज्ञान प्रदान गर्दै आर्थिक रूपमा सशक्त बनाउन सहयोग गर्नु थियो ।
कार्यक्रमको स्वागत मन्तव्य शाखा प्रमुख इस्वर लम्सालले दिनुभएको थियो भने कार्यक्रमको सञ्चालन सोही शाखाका कर्मचारी उमेश हरिजन चमारले गर्नुभएको थियो ।
कार्यक्रमका प्रशिक्षक शम्भु प्रसाद रेग्मीले वित्तीय साक्षरताका विभिन्न पक्षहरूमा प्रकाश पार्नुभएको थियो। उहाँले पैसाको सही व्यवस्थापन, बचतको महत्व, कर्जाको उचित प्रयोग, र दीर्घकालीन आर्थिक योजनाको आवश्यकता जस्ता विषयहरूमा महत्वपूर्ण जानकारी प्रदान गर्नुभयो ।
कार्यक्रमका प्रमुख अतिथि बुलिङटार गाउँपालिका वडा नं. ३ का वडा अध्यक्ष विष्णु वीर जघा मगर ले सहभागीहरूलाई वित्तीय ज्ञानमार्फत आफ्नो व्यवसाय वृद्धि गर्न उत्प्रेरित गर्दै कार्यक्रमको सफलताको शुभकामना व्यक्त गर्नुभयो। उहाँले कर्जा लिएपछि अनुशासित तरिकाले प्रयोग गर्ने र नियमअनुसार समयमै भुक्तानी गर्ने ऋणीको कर्तव्य रहेको कुरा पनि उल्लेख गर्नुभयो ।
विशिष्ट अतिथि बुलिङटार गाउँपालिकाका निमित्त प्रमुख प्रशासनिक अधिकृत सिताराम खनाल ले वित्तीय साक्षरताको महत्त्वबारे प्रकाश पार्दै यस्ता कार्यक्रमहरू स्थानीय नागरिकका लागि निकै उपयोगी हुने बताउनुभयो। उहाँले वित्तीय अनुशासन कायम गर्दै बचत गर्ने बानी विकास गर्न सके व्यक्तिगत आर्थिक समृद्धि मात्र नभई समग्र समाजको आर्थिक उन्नति हुने उल्लेख गर्नुभयो। साथै, उहाँले बिजय लघुवित्त वित्तीय संस्थाले सञ्चालन गरेका यस्ता कार्यक्रमहरू आगामी दिनमा अझ व्यापक रूपमा लैजानुपर्ने सुझाव दिनुभयो ।
