बुलिङटार, नवलपुर। डाँडाझेरी स्वास्थ्य चौकीमा दुई वर्षमुनिका बालबालिका तथा उनीहरूका आमाहरूको सहभागितामा ‘खोपसँगै सरसफाइ’ सम्बन्धी विशेष कार्यक्रम सफलतापूर्वक सम्पन्न भएको छ ।
बालबालिकाको स्वास्थ्य प्रवर्द्धन, रोगको रोकथाम तथा सरसफाइसम्बन्धी स्वस्थ बानीको विकास गर्ने उद्देश्यले सञ्चालन गरिएको उक्त कार्यक्रममा नियमित खोप सेवासँगै सरसफाइ र व्यक्तिगत स्वच्छतासम्बन्धी सचेतना प्रदान गरिएको थियो ।
कार्यक्रमअन्तर्गत दुई वर्षमुनिका बालबालिकालाई राष्ट्रिय खोप तालिकाअनुसार आवश्यक खोप प्रदान गरिएको थियो। साथै, बालबालिकालाई विभिन्न रोगबाट सुरक्षित राख्न सरसफाइको महत्त्वबारे आमाहरूलाई जानकारी गराइएको थियो ।
कार्यक्रममा बालबालिकाको स्वास्थ्य राम्रो बनाउन नियमित खोप लगाउनुका साथै घर, भान्छा, खानेपानी तथा वरपरको वातावरण सफा राख्नुपर्ने विषयमा जोड दिइएको थियो। त्यस्तै, खाना खानुअघि र शौचालय प्रयोग गरेपछि साबुनपानीले हात धुने, बालबालिकाको व्यक्तिगत सरसफाइमा ध्यान दिने तथा स्वच्छ वातावरण कायम राख्ने बानीको विकास गर्न आमाहरूलाई प्रेरित गरिएको थियो ।
बालबालिकाको स्वस्थ भविष्य निर्माणका लागि खोप र सरसफाइ एकअर्काका परिपूरक रहेको सन्देश दिँदै कार्यक्रम सम्पन्न भएको हो ।
बालबालिकालाई रोगबाट जोगाउन नियमित खोप सेवा सुनिश्चित गर्नुका साथै सरसफाइसम्बन्धी व्यवहारमा सुधार ल्याउन यस्ता कार्यक्रमले महत्त्वपूर्ण भूमिका खेल्ने अपेक्षा गरिएको छ । बालस्वास्थ्यको संरक्षण, रोगको रोकथाम र स्वस्थ समाज निर्माणका लागि परिवार तथा समुदायको सक्रिय सहभागिता आवश्यक रहेको सन्देशसमेत कार्यक्रमले दिएको छ ।
