बुलिङटार १६ चैत । बुलिङटार गाउँपालिकाको निमन्त्रणामा गण्डकी प्रदेश आर्थिक मामिला मन्त्रालयद्वारा आयोजना गरिएको आ.ब. २०८२/०८३ को बजेट तर्जुमा पूर्वतयारी सम्बन्धी स्थानीय तहहरूसँगको छलफल कार्यक्रम नवलपुर जिल्लाको बुलिङ्टार गाउँपालिका–६ स्थित शिव माध्यमिक विद्यालयको सभाहलमा भव्य रूपमा सम्पन्न भएको छ ।
कार्यक्रममा गण्डकी प्रदेश आर्थिक मामिला मन्त्री माननीय डा.टक राज गुरुङको अध्यक्षता रहेको थियो । छलफल कार्यक्रममा नवलपरासी (बर्दघाट सुस्ता पूर्व) र तनहुँ जिल्लाका जिल्ला समन्वय समिति सभापति, १४ वटा पालिकाका प्रमुख र प्रमुख प्रशासकीय अधिकृतहरू, गण्डकी प्रदेश आर्थिक मामिला मन्त्रालयका कर्मचारीहरू, बुलिङ्टार गाउँपालिकाका जनप्रतिनिधिहरू तथा कर्मचारीहरूको उल्लेखनीय उपस्थिति रहेको थियो ।
कार्यक्रमको अध्यक्षता गर्नु भएका मन्त्री माननीय डा .टक राज गुरुङले गण्डकी प्रदेशको पहाडी भेगमा पहिलोपटक यस किसिमको कार्यक्रम सफलतापूर्वक तथा उत्साहजनक रूपमा सम्पन्न गर्न पाउँदा खुसी व्यक्त गर्नुका साथै आगामी दिनहरूमा पनि स्थानिय तहहरूसँग समन्वय गर्दै बजेट निर्माण प्रक्रिया अझ सशक्त र सहभागीमूलक बनाइने विश्वास व्यक्त गर्नुभयो ।
कार्यक्रमको आयोजना गण्डकी प्रदेश आर्थिक मामिला मन्त्रालयले गरेको हो भने व्यवस्थापन बुलिङ्टार गाउँपालिका अध्यक्ष श्री दीपेन्द्र सुनारी र वडा नं. ६ का वडाध्यक्ष श्री मोहनराज पाठकको सक्रिय पहल तथा सहयोगमा सम्पन्न भएको हो ।
कार्यक्रममा बोल्दै अध्यक्ष दिपेन्द्र सुनारीले जटिल भौगोलिक अवस्थाका बाबजुद पनि यस्तो महत्वपूर्ण कार्यक्रम आयोजना गरेर गण्डकी प्रदेश आर्थिक मामिला मन्त्रालयले देखाएको पहलप्रति आभार व्यक्त गर्दै, स्थानिय तहहरूको सशक्तीकरणका लागि यस्ता कार्यक्रमहरू अत्यन्तै आवश्यक रहेको बताउनुभयो ।
