बुलिङटार २१ चैत । बुलिङटार गाउँपालिकाको आयोजनामा पोषणमैत्री स्थानीय शासन सम्बन्धी सूचकहरू हासिल गर्ने उद्देश्यसहित सरकारवालाहरूका लागि एकदिने अभिमुखीकरण कार्यक्रम सम्पन्न गरिएको छ ।
कार्यक्रम गाउँपालिका अध्यक्ष श्री दिपेन्द्र सुनारीको अध्यक्षतामा सम्पन्न भएको हो।
कार्यक्रमको मुख्य उद्देश्य स्थानीय तहमा पोषणमैत्री वातावरण सिर्जना गर्दै आवश्यक सूचकहरू पूरा गरी विक्रम संवत २०८३ असार मसान्तभित्र बुलिङटारलाई पोषणमैत्री गाउँपालिका घोषणा गर्नु रहेको छ । यसै सन्दर्भमा कार्यक्रमको अन्त्यमा सहभागी सबै जनप्रतिनिधिहरू र कर्मचारीहरूले सामूहिक रूपमा प्रतिबद्धता पत्रमा हस्ताक्षर गरी पोषणमैत्री घोषणा प्रक्रियामा सक्रिय सहभागी हुने अठोट व्यक्त गर्नुभयो ।
कार्यक्रममा उपाध्यक्ष दिलमाया राना, वडा अध्यक्षहरू, प्रमुख प्रशासकीय अधिकृत श्री रामचन्द्र भुषाल, विभिन्न शाखाका शाखा प्रमुख तथा कर्मचारीहरूको उल्लेखनीय उपस्थिति रहेको थियो। कार्यक्रम सञ्चालन देव राज सुनारी ले गर्नु भएको थियो भने प्रशिक्षण श्री शालिग्राम पोखरेलले दिनु भएको थियो ।
कार्यक्रममा पोषण, स्वास्थ्य, शिक्षा, कृषि, खानेपानी, सरसफाइ लगायत बहुपक्षीय क्षेत्रका सूचकहरूका विषयमा गहिरो छलफल गरिएको थियो। सहभागीहरूले पोषणका सवालमा स्थानीय तहको भूमिका र दायित्वबारे थप स्पष्टता पाएको र आगामी कार्ययोजनाहरू प्रभावकारी ढंगले कार्यान्वयन गर्ने प्रतिबद्धता जाहेर गर्नु भएको छ ।
