बुलिङटार २ असार । बुलिङटार गाउँपालिका कार्यालय र बुलिङटार प्रेस को समन्वयनमा “जनतासँग अध्यक्ष कार्यक्रम” वडा नं.१, २ र ४ मा भव्य रूपमा सम्पन्न भएको छ ।
कार्यक्रमको अध्यक्षता गाउँपालिका अध्यक्ष ई.दिपेन्द्र सुनारी मगर, बिशेष अतिथि वडा नं -०१ का वडाअध्यक्ष दिल बहादुर सुर्यबंसी मगर, वडा नं.२ का कमल राज वाकबल मगर र ४ क वडा अध्यक्ष मिन बहादुर आले मगरले गर्नुभएको थियो ।
वडा नं. १,२, र ४ का कार्यक्रममा आ-आफ्नो वडामा पालिका अध्यक्ष सँगै वडा अध्यक्षहरू, अन्य जनप्रतिनिधिहरू, स्थानीय बुद्धिजीवी, सामाजिक अगुवा तथा स्थानीय नागरिकहरूको उल्लेखनीय उपस्थिति रहेको थियो ।
कार्यक्रममा सम्बोधन गर्दै अध्यक्ष दिपेन्द्र सुनारी मगरज्यू लगायत सम्बन्धित वडा अध्यक्षहरूले स्थानीय सरकारलाई जनउत्तरदायी, पारदर्शी र जनमुखी बनाउने उद्देश्यले “जनतासँग अध्यक्ष कार्यक्रम” सञ्चालन गरिएको जानकारी दिनुभयो ।
योजना निर्माण देखि कार्यान्वयनसम्म जनताको आवश्यकता र सहभागितालाई प्राथमिकतामा राखिनेछ भन्ने कुरा पनि भन्नुभयो ।
साथै, पालिका अध्यक्ष दिपेन्द्र सुनारी मगरले आगामी दिनहरूमा अन्य वडाहरूमा पनि यस्ता कार्यक्रम निरन्तर रूपमा सञ्चालन गरिने जानकारी पनि दिनुभयो।
कार्यक्रमका क्रममा स्थानीयवासीहरूले खानेपानी, सडक, कृषि, शिक्षा, स्वास्थ्यलगायत विविध क्षेत्रका समस्या तथा सुझावहरू राख्नु भएको थियो। वडास्तरमै नागरिकसँग प्रत्यक्ष संवाद गर्नुपर्छ भन्ने सोचका साथ सञ्चालन गरिएको यो कार्यक्रम सहभागी सबैले सकारात्मक रूपमा ग्रहण गर्नु भएको छ ।
