बुलिङटार १० असार । बुलिङटार गाउँपालिकाको १७औँ गाउँसभा अधिवेशन सफलता पूर्वक सम्पन्न भएको छ । अधिवेशनमार्फत गाउँपालिकाले आगामी आर्थिक वर्ष २०८२/८३ का लागि करिब ५१ करोड ५० लाख रुपैयाँ बराबरको बजेट विनियोजन गरेको छ ।
गाउँपालिकाका अध्यक्षको अध्यक्षतामा सम्पन्न उक्त अधिवेशनमा चालू आर्थिक वर्षको समिक्षासँगै शिक्षा, स्वास्थ्य, कृषि, पूर्वाधार, खानेपानी, सामाजिक सुरक्षा र रोजगारीजस्ता क्षेत्रलाई प्राथमिकतामा राखी नीति, कार्यक्रम तथा बजेट प्रस्तुत गरिएको हो ।
गाउँसभा अधिवेशनमा वडाध्यक्षहरू, सदस्यहरू, विषयगत समितिका संयोजकहरू, कर्मचारीहरुको सहभागिता रहेको थियो। सहभागीहरूले विकास योजनामा जनताको सहभागिता सुनिश्चित गर्दै समावेशी र पारदर्शी ढंगले बजेट कार्यान्वयनमा जोड दिन सुझाव दिएका थिए ।
गाउँपालिका अध्यक्षका अनुसार आगामी वर्षको बजेट समावेशी, दिगो र स्थानीय आवश्यकताअनुकूल हुने गरी बनाइएको हो। अधिवेशनले नीति निर्माण तथा सुशासन प्रवर्द्धनमा सकारात्मक सन्देश दिएको अध्यक्षको भनाइ छ ।
