बुलिङटार २४ पुस । बुलिङटार गाउँपालिका भित्रका उत्कृष्ट विद्यार्थी, विषयगत शिक्षक, विद्यालय र प्रतिभावाहन विद्यार्थी खेलाडीहरुलाई सम्मान कार्यक्रम सम्पन्न भएको छ ।
बुलिङटार गाउँपालिकाको युवा तथा खेलकुद शाखाको आयोजनामा सम्मान सो कार्यक्रम सम्पन्न गरिएको छ ।
उक्त कार्यक्रम शिक्षा शाखा प्रमुख श्री बुद्ध रानाभाटको अध्यक्षतामा र गाउँपालिका अध्यक्ष श्री दिपेन्द्र सुनारी मगरकाे प्रमुख अतिथि, उपाध्यक्ष श्री दिल माया राना मगर विशिष्ट अतिथि बुलिङटार गाउँपालिका प्रमुख प्रशासकीय अधिकृत श्री विष्णु बहादुर थापा विशेष अतिथिका रूपमा सहभागी हुनुभएको थियो ।
कार्यक्रममा वडाअध्यक्षहरू, शाखा प्रमुखहरू, विद्यालय व्यवस्थापन समितिका अध्यक्षजहरू, प्रधानाध्यापकहरू, शिक्षकहरू, कर्मचारीहरू तथा विद्यार्थीहरूको उल्लेखनीय उपस्थिति रहेको थियो ।
कार्यक्रमको उद्देश्यअनुसार कक्षा ५, ८, १० र १२ को परीक्षामा उत्कृष्ट नतिजा हासिल गर्ने विद्यार्थीहरूलाई क्रमशः प्रथम, द्वितीय तथा तृतीय स्थान प्राप्त गर्नेहरूलाई नगद पुरस्कार तथा प्रमाणपत्र प्रदान गरिएको थियो भने अन्य उत्कृष्ट विद्यार्थीहरूलाई पनि प्रमाणपत्र वितरण गरिएको थियो । साथै उत्कृष्ट नतिजा हासिल गराउन महत्वपूर्ण भूमिका निर्वाह गर्ने सम्बन्धित विषयगत शिक्षकहरूलाई प्रमाणपत्र तथा दोसल्ला ओढाई सम्मान गरिएको थियो ।
यसका साथै जिल्ला स्तरीय राष्ट्रपति रनिङ शिल्ड प्रतियोगिता–२०८२ मा पदक प्राप्त गर्ने विद्यार्थी–खेलाडीहरूलाई नगद पुरस्कार तथा प्रमाणपत्र प्रदान गर्दै शिक्षा र खेलकुद दुवै क्षेत्रमा अनुशासन, प्रतिस्पर्धा र उत्कृष्टतालाई प्रवर्द्धन गर्ने लक्ष्यका साथ कार्यक्रम सफलतापूर्वक सम्पन्न गरिएको छ ।