बुलिङटार १९ माघ । बुलिङटार गाउँपालिकाकाको समन्यवमा Youth Action for Sustainable and Eco Nepal (YASEN) को आयोजनामा महिला समूहलाई सशक्त बनाउँदै सामुदायिक बिउ बैंक स्थापना गर्ने उद्देश्यसहित “जलवायु मैत्री कृषि तथा महिला सशक्तिकरण कृषि मेला–२०८२” सम्पन्न भएको छ ।
कार्यक्रमलाई सम्बोधन गर्दै गाउँपालिका अध्यक्ष श्री दीपेन्द्र सुनारी मगरले जलवायु परिवर्तनले कृषिमा पारेको गम्भीर असरप्रति ध्यानाकर्षण गराउँदै स्थानीय रैथाने बिउहरूको संरक्षण, संवर्द्धन र दीगो उपयोग अपरिहार्य भएको स्पष्ट पार्नुभयो । उहाँले रैथाने बिउ केवल उत्पादनको स्रोत मात्र नभई खाद्य सुरक्षा, जैविक विविधताको संरक्षण तथा स्थानीय पहिचानसँग जोडिएको अमूल्य सम्पदा भएको उल्लेख गर्दै महिला कृषकहरूको भूमिकालाई अझ प्रभावकारी बनाउने यस्ता कार्यक्रमहरू निरन्तर सञ्चालन गरिनुपर्ने धारणा व्यक्त गर्नुभयो ।
उक्त कृषि कार्यक्रमा स्थानीय रैथाने प्रजातिका बिउहरूको विशेष प्रदर्शनी समेत आयोजना गरिएको थियो । प्रदर्शनीमार्फत विभिन्न परम्परागत बाली तथा बिउहरू सार्वजनिक रूपमा अवलोकन गरिनुका साथै तिनको महत्व, संरक्षण विधि र उपयोगिताबारे जानकारी आदान–प्रदान गरिएको थियो ।
यसले कृषकहरूमा रैथाने बिउप्रतिको चासो र अपनत्व अभिवृद्धि गर्न महत्वपूर्ण भूमिका खेलेको थियो । कार्यक्रमले महिला कृषकहरूलाई जलवायु मैत्री कृषि अभ्यास, आत्मनिर्भर कृषिप्रणाली तथा सामुदायिक बिउ बैंकमार्फत बिउ संरक्षणको दिशामा प्रेरित गरेको थियो । साथै स्थानीय बिउहरूको दीगो संरक्षण गर्दै भावी पुस्ताका लागि सुरक्षित राख्ने साझा प्रतिबद्धता समेत व्यक्त गरिएको थियो ।
कार्यक्रममा बुलिङटार गाउँपालिका अन्तर्गत वडा नम्बर १ देखि ६ सम्मका वडा अध्यक्षज्यूहरू, गाउँपालिका कर्मचारी अन्य जनप्रतिनिधिहरू, विभिन्न महिला समूहहरू तथा कृषकहरूको व्यापक, उत्साहजनक र अर्थपूर्ण सहभागिता रहेको थियो । कृषकहरूबीच अनुभव आदान–प्रदान, रैथाने बिउको प्रदर्शनी तथा जलवायु अनुकूल कृषि अभ्याससम्बन्धी छलफलसहित कार्यक्रम अत्यन्त प्रभावकारी थियो ।
