नवलपुर १२ फागुन । आगामी निर्वाचनलाई लक्षित गर्दै भागीरथ सापकोटाले नवलपुर जिल्ला निर्वाचन क्षेत्र नं. १ मा मतदाता भेटघाट तथा घरदैलो कार्यक्रमलाई तीव्र बनाएका छन् ।
सोमबार देवचुलीका विभिन्न टोल तथा बस्तीमा पुगेर उम्मेदवार सापकोटाले स्थानीय नागरिकसँग प्रत्यक्ष संवाद गर्दै जनताको आवश्यकता, अपेक्षा तथा सुझावहरू संकलन गरिरहेका छन्। घरदैलो अभियानका क्रममा उनले विकास, सुशासन, रोजगारी सिर्जना तथा पूर्वाधार निर्माणलाई आफ्नो प्रमुख प्राथमिकता रहेको बताएका छन् ।
स्थानीय बासिन्दासँग भेटघाट गर्दै सापकोटाले क्षेत्रको समग्र विकासका लागि आफू प्रतिबद्ध रहेको उल्लेख गर्दै शिक्षा, स्वास्थ्य, कृषि तथा सडक पूर्वाधारलाई मजबुत बनाउने योजनासहित अघि बढ्ने प्रतिवद्धता व्यक्त गरेका छन् । देवचुलीमा पर्यटकीय स्थानहरु पर्याप्त भएकाले प्रचारप्रसार गरि आन्तरिक तथा बाह्रय पर्यटकलाई ल्याउनका लागि सकिने भन्दै सापकोटाले मतदाताले आफुलाई सहयोग गर्न आग्रह गरे । पर्यटन प्रवर्द्धन गरि आर्थिक सुदृढीकरण गर्न सकिने, वनमा आधारित उद्यमलाई व्यवस्थित गर्न सकिने आधारहरु उहाँले मतदाता समक्ष बताए ।
घरदैलो कार्यक्रममा पार्टीका नेता, कार्यकर्ता तथा समर्थकहरूको उल्लेख्य सहभागिता रहेको छ। स्थानीय मतदाताहरूले उम्मेदवारसँग आफ्ना वडा तथा टोलका समस्या र सुझाव राख्दै सकारात्मक प्रतिक्रिया दिएका थिए ।
