बुलिङटार १४ वैशाख। बुलिङटार गाउँपालिकामा “बस्न योग्य, हेर्न लायक समृद्ध बुलिङटार” भन्ने मूल नाराका साथ “पूर्णखोप सुनिश्चितता तथा दिगोपना घोषणा समारोह” भव्यताका साथ सम्पन्न भएको छ ।
गाउँपालिकाका अध्यक्षज्यूको अध्यक्षतामा आयोजित यस विशेष कार्यक्रममा प्रदेश जनस्वास्थ्य कार्यालय, नवलपरासी (बर्दघाट सुस्ता पूर्व) का कार्यालय प्रमुख श्री केशव प्रसाद चापागाईं ज्यूको प्रमुख विशेष उपस्थितिमा कार्यक्रम भएको हो ।
कार्यक्रममा पालिकाभित्रका विभिन्न स्वास्थ्य संस्थाका प्रमुखहरू, खोप फोकल पर्सनहरू, महिला सामुदायिक स्वास्थ्य स्वयंसेविकाहरू तथा पालिकाका कर्मचारीहरूको उपस्थिति रहेको थियो ।
पालिकाका सम्पूर्ण बालबालिकाहरूलाई पूर्ण खोपको पहुँचमा पुर्याई यसको निरन्तरता र दिगोपना सुनिश्चित गर्नका लागि महत्त्वपूर्ण योगदान पुर्याउनुहुने सम्पूर्ण स्वास्थ्यकर्मी, स्वयंसेविका, जनप्रतिनिधि एवं स्थानीय बासिन्दाहरूमा हार्दिक आभार तथा धन्यवाद यस गाउँपालिका जनस्वास्थ्य अधिकृत अशोक श्रेष्ठले दिनु भएको छ ।
आगामी दिनहरूमा पनि स्वास्थ्य क्षेत्रका यस्ता उपलब्धिहरूलाई जोगाइराख्न हामी सबैको सहकार्य निरन्तर रहन प्रतिवद्धता गर्नु भएको छ ।
