बुलिङटार २८ जेठ । पूर्वी नवलपरासीको बुलिङटार गाउँपालिकाले कालीगण्डकी करिडोरसम्म जोड्न ढलान सडकलाई प्राथमिकता दिएर काम गरेको छ ।
करिब ४४ किलोमिटर लामो कालीगण्डकी करिडोरको बाटो यस बुलिङटार गाउँपालिका भित्र पर्दछ ।
करिडोरको बाटोमा निस्किनको लागि ग्रामीण क्षेत्रमा जनतालाई करिडोरको पहुँचसम्म आउन सजिलो होस् भन्ने उद्देश्यले विभिन्न लिंक रोडहरु बनाउने कामलाई प्राथमिकतामा राखेर काम गरेको गाउँपालिकाका अध्यक्ष इन्जिनियर दीपेन्द्र सुनारीले जानकारी दिए ।
उनका अनुसार विभिन्न वडाबाट करिडोरसम्मको पहुँचलाई सहज बनाउन ८ किलोमिटर सडक ढलान गरिसकिएको छ भने अन्य भागमा काम बाँकी नै छ ।
गाउँपालिकाका ६ वटा वडा मध्ये वडा नं. ५ बाहेक सबै वडा भएर कालीगण्डकी करिडोरको सडक गएको छ । ‘करिडोर भएर जनतालाई सहज त भयो, तर करिडोरको सडकबाट गाउँसम्म जान असुविधा भएकोले पालिकाले आवश्यकता अनुसार लिंक रोडहरु बनाएका छौ, कतिपय बन्ने क्रममा छन्’, अध्यक्ष सुनारीले भने, ‘ग्रामीण भेग भएकोले कालोपत्रे गर्दा लामोसमयसम्म नटिक्ने र पिच भत्काउने सम्भावना भएकोले महंगो मूल्य परे पनि नालीसहितको ढलान बाटोलाई पालिकाले प्राथमिकतामा राखेका छौं ।’
कालीगण्डकी करिडोर बनेपछि बुलिङटारका जनताको जीवनमा ठूलो परिवर्तन आएको अध्यक्ष सुनारीले बताए ।
