बुलिङटार १० असार । बुलिङटार गाउँपालिकाको गाउँसभाको १९औँ अधिवेशनले आगामी आर्थिक वर्ष २०८३/८४ का लागि नीति, कार्यक्रम तथा बजेट पारित गरेको छ।
आगामी आर्थिक वर्षका लागि स्वीकृत नीति तथा कार्यक्रमले सुशासन र प्रभावकारी सेवा प्रवाहलाई केन्द्रमा राख्दै कृषि तथा पशुपालनको आधुनिकीकरण, उत्पादन र उद्यमशीलताको प्रवर्द्धन, गुणस्तरीय तथा प्राविधिक शिक्षाको विस्तार, सुलभ र गुणस्तरीय स्वास्थ्य सेवाको सुनिश्चितता, महिला, बालबालिका, ज्येष्ठ नागरिक तथा लक्षित वर्गको सशक्तीकरण, दिगो पूर्वाधार निर्माण तथा स्थानीय स्तरमा रोजगारी सिर्जनालाई प्रमुख प्राथमिकताका रूपमा अघि सारेको छ।
गाउँपालिकाले आगामी आर्थिक वर्ष २०८३/८४ का लागि रु. ५० करोड ५७ लाख ३४ हजार २ सय २८ बराबरको बजेट पारित गरेको छ। गाउँसभाका अध्यक्ष तथा गाउँपालिका अध्यक्ष ई. दिपेन्द्र सुनारी मगरले नीति तथा कार्यक्रम प्रस्तुत गर्नुभएको थियो भने गाउँपालिका उपाध्यक्ष दिल माया राना मगरले बजेट प्रस्तुत गर्नुभएको थियो।
स्थानीय आवश्यकता, स्रोत–साधनको विवेकपूर्ण परिचालन तथा जनअपेक्षालाई केन्द्रमा राखेर तर्जुमा गरिएको नीति, कार्यक्रम तथा बजेटले कृषि, शिक्षा, स्वास्थ्य, पूर्वाधार तथा सामाजिक विकासका क्षेत्रमा गुणात्मक परिवर्तन ल्याउने अपेक्षा गरिएको छ। साथै, यसले स्थानीय अर्थतन्त्रलाई सबल बनाउँदै समावेशी, दिगो र परिणाममुखी विकासको आधार तयार गर्ने विश्वास गाउँपालिकाले लिएको छ।
बुलिङटारको समग्र समृद्धि, सुशासनको सुदृढीकरण र नागरिकको जीवनस्तरमा सकारात्मक रूपान्तरण ल्याउने साझा प्रतिबद्धतासहित गाउँपालिकाले पारित नीति, कार्यक्रम तथा बजेटको प्रभावकारी कार्यान्वयनमा सम्पूर्ण सरोकारवालाको सहयोग, सहकार्य र सहभागिताको अपेक्षा गरेको छ।
