बुलिङटार ११ असार । नवलपरासी (बर्दघाट-सुस्ता पूर्व) को बुलिङटार गाउँपालिका मा मगर ढुट भाषामा समेत पठनपाठन सञ्चालन गर्ने उद्देश्यका साथ स्थानीय विषयको पाठ्यक्रम (कक्षा १–८) तथा कक्षा १–३ को पाठ्यपुस्तक (मगर र नेपाली भाषामा) मस्यौदा प्रतिवेदन प्रस्तुति तथा अन्तरक्रिया कार्यशाला गोष्ठी सम्पन्न भएको छ ।

गाउँपालिकाको स्वीकृत वार्षिक कार्यक्रम अन्तर्गत आयोजित यस कार्यशालामा स्थानीय जनप्रतिनिधि, शिक्षाप्रेमी, शिक्षक, पाठ्यक्रम विज्ञहरूको व्यापक सहभागिता रहेको थियो ।
उक्त महत्त्वपूर्ण कार्यक्रममा नेपाल मगर संघ जिल्ला समन्वय समितिका उपाध्यक्षज्यूहरु का साथै नेपाल मगर संघ बुलिङटार गाउँपालिका कार्यसमितिका पदाधिकारीहरूको समेत विशेष उपस्थिति रहेको थियो ।

कार्यक्रममा उपस्थित मगर संघका प्रतिनिधिहरूले स्थानीय स्तरमा मातृभाषा शिक्षा लागू गर्ने पालिकाको यो प्रयास अत्यन्तै सराहनीय रहेको उल्लेख गर्दै यसको सफल कार्यान्वयनका लागि संस्थागत रूपमा आवश्यक सम्पूर्ण सहयोग र सहकार्य गर्ने प्रतिबद्धता व्यक्त गर्नुभयो।