बुलिङटार १५ असार । बुलिङटार गाउँपालिकाको बारेमा हाल सामाजिक सञ्जाल तथा अन्य माध्यमहरूमा बुलिङटार गाउँपालिकाबाट वितरण गरिएको अनुदान सम्बन्धी सामग्री, विशेष गरी त्रिपाल वितरणको विषयलाई लिएर विभिन्न टिप्पणी, गुनासा तथा जिज्ञासाहरू सार्वजनिक भएको प्रति गाउँपालिकाको ध्यानाकर्षण भएको छ ।
यस सम्बन्धमा जानकारी गराउन चाहन्छौं कि गाउँपालिकाबाट Super Paulin 120 GSM १५*१८ sq feet साईजको त्रिपाल वितरण गरिएको र यसको बजार मूल्य अन्य ब्राण्डको त्रिपालको भन्दा फरक हुने बजारमा बुझेर समेत जानकारी लिन सकिन्छ ।
प्लास्टिक जन्य सामानको बजार मूल्य ब्रान्ड, GSM, साइज, गुणस्तर अनुसार फरक–फरक हुने गर्दछ। साथै पछिल्लो समय अन्तर्राष्ट्रिय बजारमा पेट्रो–केमिकल पदार्थको अभाव तथा मूल्यवृद्धिका कारण प्लास्टिकजन्य सामग्रीहरूको मूल्यमा निरन्तर उतारचढाव भइरहेको र बजार मूल्य समेत एकरूप नरहेको व्यहोरा सम्बन्धित सबैमा जानकारी गराइन्छ ।
साथै, चालु आर्थिक वर्षमा गाउँपालिकाको पालिका स्तरिय कार्यक्रमबाट धानको बीउ लगायतका कृषि सामग्री वितरण सम्बन्धी कुनै अनुदान कार्यक्रम सञ्चालन नभएको समेत स्पष्ट गर्न चाहन्छौं ।
गाउँपालिकाको सेवा प्रवाह, विकास निर्माण, अनुदान वितरण तथा अन्य नियमित कार्यसम्पादनका विषयमा कुनै जिज्ञासा, सुझाव वा गुनासा भएमा सम्बन्धित शाखा, वडा कार्यालय वा गाउँपालिकामा प्रत्यक्ष सम्पर्क गरी जानकारी लिन तथा आफ्नो धारणा राख्न सकिनेछ। प्राप्त गुनासा तथा सुझावहरूलाई गाउँपालिकाले सदैव सकारात्मक रूपमा ग्रहण गर्दै सेवा प्रवाहलाई अझ प्रभावकारी, पारदर्शी, उत्तरदायी र नागरिकमैत्री बनाउँदै लैजान प्रतिबद्ध रहेको व्यहोरा समेत सम्पूर्ण सरोकारवालाहरूमा जानकारी गराइन्छ ।
