असार २४, कावासोती (नवलपुर) ।
पूर्व–पश्चिम राजमार्ग अन्तर्गत नवलपुरको कावासोतीमा बुधबार दिउँसो एक विद्युतीय (इभी) हाइसले मोटरसाइकललाई ठक्कर दिँदा दुई जना घाइते भएका छन्। कावासोती नगरपालिका वडा नं. २ स्थित इन्द्रचोकमा दिउँसो करिब ३:०० बजे उक्त दुर्घटना भएको हो।

जिल्ला प्रहरी कार्यालय नवलपुरका सूचना अधिकारी एवं प्रहरी नायब उपरीक्षक (डीएसपी) अनिल पण्डितका अनुसार, दाउन्नेबाट नारायणगढतर्फ जाँदै गरेको लु.प्र. ०१–००१ ज १०४२ नम्बरको इभी हाइसले बाटो काट्दै (क्रस गर्दै) गरेको लु १७ प ८१६७ नम्बरको मोटरसाइकललाई ठक्कर दिएको थियो।

दुर्घटनामा परि मोटरसाइकल चालक कावासोती-४ बस्ने ४० वर्षीय सुशील पौडेल र सोही स्थानका ३९ वर्षीय नारायण पाण्डे घाइते भएका छन्। घाइतेमध्ये चालक पौडेलको दुवै हात र खुट्टामा चोट लागेको र उनको अवस्था मध्यम रहेको प्रहरीले जनाएको छ। पछाडि सवार पाण्डे भने सामान्य घाइते भएका छन्।

घटनालगत्तै दुवै घाइतेलाई उद्धार गरी उपचारका लागि कावासोतीस्थित नवलपुर अस्पताल पठाइएको छ। ठक्कर दिने हाइस, मोटरसाइकल र हाइस चालक रुपन्देही जिल्ला तिलोत्तमा नगरपालिका वडा नं. २ बस्ने ३१ वर्षीय रमेश घर्तीलाई प्रहरीले नियन्त्रणमा लिएको छ। दुर्घटनाबारे थप अनुसन्धान भइरहेको जिल्ला प्रहरी कार्यालय नवलपुरले जनाएको छ।