बुलिङटार १२ साउन । बुलिङटार गाउँपालिका वडा नं. २ मा सामाजिक सुरक्षा भत्ता वितरण कार्य आजदेखि औपचारिक रूपमा प्रारम्भ भएको छ ।
वडा कार्यालयले यस पटकको भत्ता वितरण कार्यमा अपाङ्गता भएका लाभग्राहीहरूलाई पहिलो प्राथमिकतामा राखेर वितरण कार्यको सुरुवात गरेको हो । वडाले सामाजिक रूपमा पछाडि परेका र फरक क्षमता भएका नागरिकको सहजतालाई ध्यान दिँदै यस्तो व्यवस्था गरेको जनाएको छ ।
यसैबीच, वडा कार्यालयले सूचना जारी गर्दै अन्य सम्पूर्ण लक्षित लाभग्राहीहरूलाई पनि तोकिएको समय र स्थानमा उपस्थित भई आफ्नो सामाजिक सुरक्षा भत्ता बुझिलिन अनुरोध गरेको छ । भत्ता लिन आउँदा आफ्नो परिचय खुल्ने आवश्यक कागजात (जस्तै: नागरिकता वा भत्ता कार्ड) साथमा लिएर आउन समेत वडाबासीलाई आग्रह गरिएको छ ।
