बुलिङटार १४ साउन । बुलिङटार गाउँपालिका वडा नं. ४ मा बिहीबारदेखि सामाजिक सुरक्षा भत्ता वितरण कार्य सफलतापूर्वक शुभारम्भ गरिएको छ ।
वर्षातको समयमा भत्किएका सडक र अत्यन्तै कठिन बाटोका बाबजुद पनि स्थानीय प्रशासन र जनप्रतिनिधिहरूको विशेष सक्रियतामा भत्ता वितरण कार्य सहज रूपमा अघि बढाइएको हो ।
चुनौतीपूर्ण र जोखिमपूर्ण अवस्थालाई चिर्दै लक्षित वर्गका नागरिकलाई उनीहरूकै पायक पर्ने स्थानमा सेवा पुर्याउने उद्देश्यले यो कार्यको थालनी गरिएको वडा कार्यालयले जनाएको छ ।बाटोको खराब अवस्था र भौगोलिक विकटताका कारण भत्ता लिन आउन र वितरण गर्न निकै सास्ती खेप्नुपरे पनि पहिलो दिनको वितरण कार्य सफलतापूर्वक सम्पन्न भएको छ ।
राज्यले दिने सामाजिक सुरक्षा भत्ता गाउँघरमै हातमा पाउँदा स्थानीय ज्येष्ठ नागरिक, अपाङ्गता भएका व्यक्ति तथा एकल महिलाहरू निकै हर्षित भएका छन् । बाँकी रहेका लक्षित वर्गलाई पनि तोकिएकै समयभित्र सुरक्षित रूपमा भत्ता वितरण गरिसक्ने गरी वडा कार्यालयले आवश्यक तयारी र समन्वय गरेको छ ।
