बुलिङटार १८ साउन । नवलपरासी (बर्दघाट सुस्तापूर्व) को पहाडी क्षेत्रमा अवस्थित बुलिङटार गाउँपालिका वडा नं. ६ मा सामाजिक सुरक्षा भत्ता वितरण कार्यक्रम सफलतापूर्वक सम्पन्न भएको छ ।
वडा कार्यालयद्वारा आयोजित उक्त कार्यक्रममा वडाभित्र रहेका लक्षित वर्गका लाभग्राहीहरूलाई चालु त्रैमासिक अवधिको भत्ता वितरण गरिएको हो ।
भत्ता वितरण कार्यक्रममा वडा नं. ६ (भारतिपुर) का ज्येष्ठ नागरिक, एकल महिला, अपाङ्गता भएका व्यक्ति, असहाय तथा अन्य योग्य लाभग्राहीहरूको उल्लेख्य उपस्थिति रहेको थियो ।
बैंक तथा स्थानीय जनप्रतिनिधिहरूको समन्वयमा लाभग्राहीहरूलाई सहज र सुरक्षित तवरले भत्ता रकम उपलब्ध गराइएको वडा कार्यालयले जनाएको छ ।
गाउँपालिकाले अशक्त तथा बैंकसम्म पुग्न नसक्ने नागरिकहरूलाई लक्षित गरी वडास्तरबाटै सामाजिक सुरक्षा भत्ता वितरण गर्ने व्यवस्था मिलाएकाले स्थानीय बासिन्दा निकै हर्षित भएका छन् । भत्ता बुझ्न आएका एक ज्येष्ठ नागरिकले भने, “गाउँघरमै, आफ्नै वडा कार्यालयमा आएर सजिलैसँग भत्ता रकम बुझ्न पाउँदा निकै सजिलो भएको छ। बैंक धाउनुपर्ने र लाइन बस्नुपर्ने झन्झट हटेको छ ।”
वडा कार्यालयका अनुसार राज्यले प्रदान गर्ने सामाजिक सुरक्षा भत्तालाई वास्तविक र लक्षित वर्गसम्म पारदर्शी रूपमा पुर्याउन स्थानीय सरकार प्रतिवद्ध रहेको छ। साथै, भत्ता प्राप्त गर्न बाँकी रहेका तथा नयाँ लाभग्राहीहरूलाई आवश्यक कागजातसहित नयाँ निवेदन दिन र पुराना लाभग्राहीहरूलाई तोकिएको समयभित्र नवीकरण प्रक्रिया पूरा गर्न समेत वडा कार्यालयले अपिल गरेको छ ।
