बुलिङटार ०१ नवलपुर। नवलपुरको बुलिङटार गाउँपालिका वडा नं. १ स्थित ढाँडबेसी टोल विकास संस्थाले आफ्नो क्षेत्रमा एक उदाहरणीय कृषि कार्य सम्पन्न गरेको छ ।
संस्थाले बुलिङटार गाउँपालिकाको कृषि शाखासँग समन्वय गरी स्थानीय ‘थाम ढिक पाखा’ मा रहेको बाँझो जग्गाको सदुपयोग गरेको हो ।
उक्त बाँझो जग्गालाई उपयोगमा ल्याउन पहिलो चरणमा विभिन्न फलफूलका बिरुवाहरू रोपिएका छन् ।
कृषि शाखाको प्राविधिक सहयोगमा त्यहाँ आँप, लिची, एभोकाडो र कटहरका बिरुवाहरू सफलतापूर्वक लगाइएको छ ।
फलफूलका बिरुवा रोपेसँगै उक्त जग्गालाई थप उत्पादनशील बनाउन टोलबासीहरू पुनः एकजुट भएका छन् ।
स्थानीय बासिन्दाहरूले सामूहिक रूपमा सोही जग्गामा गहत, मास र बोडी जस्ता दलहन बालीका बीउहरू समेत छर्ने काम सम्पन्न गरेका छन् । यस्ता बहुवर्षीय फलफूल र अल्पकालीन दलहन बाली सँगै लगाउँदा जग्गाको सदुपयोग हुनुका साथै माटोको उर्वराशक्ति पनि बढ्ने गर्दछ ।
लामो समयदेखि प्रयोगविहीन रहेको पाखो जग्गालाई हरियाली र उत्पादनमुखी बनाउन ढाँडबेसी टोलबासी जनताले देखाएको सक्रियता र श्रमदान साँच्चै नै प्रशंसनीय छ । स्थानीय टोल विकास संस्थाले यस उदाहरणीय कार्यमा अहोरात्र खटिएर श्रमदान गर्ने सम्पूर्ण उत्साही ढाँडबेसी टोलबासी आमाबुबा, दाजुभाइ तथा दिदीबहिनीहरूलाई विशेष धन्यवाद तथा आभार प्रकट गरेको छ ।
गाउँपालिकाको कृषि शाखा र स्थानीय जनताको यो संयुक्त प्रयासले आगामी दिनमा गाउँलाई फलफूल र खाद्यान्नमा आत्मनिर्भर बनाउन ठूलो टेवा पुग्ने विश्वास लिइएको छ ।
