टोल बहादुर राना मगर जापान
जापानको फुकुओका सहरको तेन्जिनस्थित नाकागावा नदीमा एक महिलाको शव फेला परेको घटनालाई प्रहरीले हत्या भएको निष्कर्ष निकालेको छ।
घटनाको अनुसन्धानका लागि प्रहरीले विशेष अनुसन्धान टोली गठन गरेको छ।
मृतक फुकुओका सहरको चुओ वार्डमा रहेको एक व्यावसायिक विद्यालयमा अध्ययनरत २५ वर्षीया नेपाली नागरिक राजबंशी लक्ष्मी रहेको प्रहरीले जनाएको छ।
प्रहरीका अनुसार गरिएको शव परीक्षणबाट उनको मृत्यु १९ तारिख बिहान सबेरै भएको अनुमान गरिएको छ। उनको टाउकोमा धेरै चोटका निशान भेटिनुका साथै शरीर र हातमा समेत चोटपटकका निशान फेला परेका छन्। यद्यपि, हालसम्म मृत्युको निश्चित कारण भने खुल्न सकेको छैन ।
त्यस्तै, लक्ष्मी बस्ने कोठामा झगडा भएको देखिने अवस्था तथा रगतका दागसमेत फेला परेको प्रहरीले जनाएको छ।
यी सबै परिस्थितिको आधारमा प्रहरीले लक्ष्मीको कसैले हत्या गरेको निष्कर्ष निकाल्दै घटनालाई ‘नेपाली महिला हत्या प्रकरण’ का रूपमा अनुसन्धान अघि बढाएको छ। घटनाको अनुसन्धानका लागि करिब ७० जना प्रहरी सम्मिलित विशेष अनुसन्धान टोली गठन गरिएको छ।
प्रहरीका अनुसार लक्ष्मीलाई अन्तिम पटक १८ तारिख राति करिब १०ः३० बजे उनको पार्टटाइम काम गर्ने रेस्टुरेन्टबाट बाहिर निस्कँदै गरेको अवस्थामा देखिएको थियो।
घटनाबारे प्रहरीले थप अनुसन्धान जारी राखेको छ।
