नवलपुर, ६ भदौ । नारायणघाट–बुटवल सडक खण्ड विस्तारको काम अन्तिम चरणमा पुगेर सरकारलाई हस्तान्तरण गर्ने तयारी भइरहेका बेला सडक भासिएपछि चिनियाँ निर्माण कम्पनीले पुनः मर्मतको काम सुरु गरेको छ ।
नवलपुरको चोरमारा, अरुणखोला लगायतका उकालो-ओरालो खण्डमा नवनिर्मित सडक दुई देखि तीन इन्चसम्म दबेको र केही भाग उठेका कारण मर्मत थालिएको हो ।तस्बिरमा देखिए अनुसार, गुडिरहेका सवारी साधन र विशेषगरी दुई तथा तीन पाङ्ग्रे सवारीको सुरक्षालाई ध्यानमा राख्दै ठेकेदार कम्पनीले बिग्रेको सडकको माथिल्लो भागको पिच (अस्फाल्ट) डोजर प्रयोग गरेर उखेलेको छ ।
सडकको बीच भाग खनेर निकालिएको उक्त पुरानो कालोपत्रेको थुप्रो सडकमै देख्न सकिन्छ भने अगाडि एउटा ब्याकहो लोडर (डोजर) ले सडक सम्याउने र मर्मत गर्ने कार्य गरिरहेको छ । ठेकेदार कम्पनी ‘चाइना स्टेट कन्स्ट्रक्सन इन्जिनियरिङ कर्पोरेसन’ का इन्जिनियर ओपेन्द्र मुखियाका अनुसार चोरमारा खण्डमा मात्रै झण्डै नौ सय मिटर सडक यसरी प्रभावित भएको छ ।
माथिल्लो पिच निकालेर मर्मत गर्दा पनि समस्या समाधान नभए थप गहिराइसम्म खनेर सुधार गरिने कम्पनीले जनाएको छ । अत्यधिक भार बोकेका मालवाहक गाडी र कमजोर भूबनोटका कारण यो समस्या आएको अनुमान गरिएको छ। १७ अर्ब रुपैयाँ लागतको यस ११४ किलोमिटर सडक खण्ड सम्झौता अनुसार हस्तान्तरण भएको ५ वर्षसम्म ठेकेदार कम्पनीले नै नि:शुल्क मर्मत गर्नुपर्नेछ ।
