नवलपुर १८ भदौ । बुलिङटार गाउँपालिकामा आर्थिक वर्ष २०८२/०८३ मा सञ्चालित स्वास्थ्य कार्यक्रमहरूको पालिकास्तरीय वार्षिक समीक्षा कार्यक्रम सम्पन्न भएको छ ।
गाउँपालिका स्वास्थ्य शाखाको आयोजनामा भएको कार्यक्रममा गाउँपालिका उपाध्यक्ष दिलमाया रानाको अध्यक्षता रहेको थियो ।
कार्यक्रममा गाउँपालिकाअन्तर्गतका आधारभूत अस्पताल, स्वास्थ्य चौकी तथा सामुदायिक स्वास्थ्य इकाइमा कार्यरत स्वास्थ्यकर्मी तथा कर्मचारीहरूको सहभागिता रहेको थियो ।
समीक्षा कार्यक्रममा आर्थिक वर्ष २०८२/०८३ मा सञ्चालन गरिएका विभिन्न स्वास्थ्य कार्यक्रमहरूको प्रगति, उपलब्धि तथा चुनौतीहरूबारे समीक्षा गरिएको थियो। साथै आगामी दिनमा स्वास्थ्य सेवालाई थप प्रभावकारी, गुणस्तरीय र नागरिकको पहुँचमा पुर्याउने विषयमा छलफल गरिएको थियो ।
कार्यक्रममार्फत स्वास्थ्य संस्थाबाट प्रदान हुँदै आएका सेवाको अवस्था मूल्याङ्कन गर्दै आगामी आर्थिक वर्षमा स्वास्थ्य कार्यक्रमलाई थप व्यवस्थित र प्रभावकारी बनाउने रणनीतिबारे समेत छलफल गरिएको जनाइएको छ ।
“बस्न योग्य, हेर्न लायक समृद्ध बुलिङटार” भन्ने नारासहित सम्पन्न कार्यक्रममा स्वास्थ्य क्षेत्रको सुधार र नागरिकलाई सहज स्वास्थ्य सेवा उपलब्ध गराउने विषयलाई प्राथमिकतामा राखिएको थियो ।
