बुलिङटार २२ भदौ । बुलिङटार गाउँपालिका स्वास्थ्य शाखाको आयोजनामा जौवारी स्वास्थ्य चौकीमा न्यूनतम सेवा मापदण्ड (Minimum Service Standards–MSS) कार्यान्वयन तथा प्रगति समीक्षा कार्यक्रम सम्पन्न भएको छ ।
स्वास्थ्य संस्थाबाट प्रदान हुँदै आएको सेवा प्रवाहलाई थप प्रभावकारी, गुणस्तरीय र व्यवस्थित बनाउने उद्देश्यले आयोजित कार्यक्रममा स्वास्थ्य चौकीको वर्तमान अवस्था तथा सेवा प्रवाहको समग्र समीक्षा गरिएको थियो ।
कार्यक्रममा स्वास्थ्य चौकीमा उपलब्ध स्वास्थ्य सेवा, भौतिक पूर्वाधार, जनशक्ति व्यवस्थापन तथा सेवाको गुणस्तरलगायत विभिन्न सूचकका आधारमा मूल्याङ्कन तथा प्रगति लेखाजोखा गरिएको थियो ।
समीक्षा क्रममा देखिएका सुधार गर्नुपर्ने पक्ष पहिचान गर्दै आगामी दिनमा स्वास्थ्य सेवाको गुणस्तर अझै प्रभावकारी बनाउने विषयमा छलफल गरिएको थियो ।
कार्यक्रममा स्वास्थ्य संस्थाको सेवा प्रवाहलाई नागरिकमैत्री बनाउँदै स्थानीय बासिन्दालाई सहज, सर्वसुलभ र गुणस्तरीय स्वास्थ्य सेवा उपलब्ध गराउन आवश्यक सुधार तथा व्यवस्थापनमा जोड दिइएको थियो ।
स्वास्थ्य क्षेत्रको विकास तथा नागरिकलाई गुणस्तरीय स्वास्थ्य सेवाको पहुँच विस्तार गर्न स्वास्थ्यकर्मी, जनप्रतिनिधि तथा सरोकारवालाबीच निरन्तर समन्वय र सहकार्य आवश्यक रहेकोमा सहभागीहरूले जोड दिएका छन् ।
बुलिङटार गाउँपालिका स्वास्थ्य शाखाले स्वास्थ्य संस्थाहरूमा न्यूनतम सेवा मापदण्डको प्रभावकारी कार्यान्वयन, नियमित अनुगमन तथा प्रगति समीक्षा गर्दै स्वास्थ्य सेवाको गुणस्तर सुधारलाई निरन्तरता दिने जनाएको छ ।
