बुलिङटार २४ भदाै । आ.व. २०८२/८३ मा सम्पन्न स्वास्थ्य कार्यक्रमका विभिन्न सूचकहरूको मूल्याङ्कनमा बुलिङटार गाउँपालिका नवलपरासी (बर्दघाट सुस्ता पूर्व) जिल्लाका सम्पूर्ण स्थानीय तहमध्ये प्रथम स्थान हासिल गर्न सफल भएको छ ।
गण्डकी प्रदेश सरकार, स्वास्थ्य मन्त्रालयअन्तर्गत प्रदेश जनस्वास्थ्य कार्यालय, नवलपरासी (बर्दघाट सुस्ता पूर्व) ले स्वास्थ्य कार्यक्रमका विभिन्न सूचकहरूको मूल्याङ्कनका आधारमा बुलिङटार गाउँपालिकालाई प्रथम स्थान प्रदान गर्दै सम्मान–पत्र प्रदान गरेको हो ।
सम्मान–पत्रमा स्वास्थ्य सेवाको प्रभावकारिता, गुणस्तरीयता र व्यवस्थापनमा पुर्याएको अतुलनीय योगदानको कदर गर्दै बुलिङटार गाउँपालिकालाई सम्मान गरिएको उल्लेख छ ।
स्वास्थ्य क्षेत्रमा प्राप्त यो उपलब्धिमा बुलिङटार स्वास्थ्य शाखा प्रमुख अशोक कुमार श्रेष्ठ, बुलिङटार आधारभूत अस्पतालसहित गाउँपालिका अन्तर्गतका सम्पूर्ण स्वास्थ्य संस्थाका प्रमुख, चिकित्सक तथा स्वास्थ्यकर्मी, महिला सामुदायिक स्वास्थ्य स्वयंसेविका, स्वास्थ्य संस्था व्यवस्थापन समिति लगायतको महत्वपूर्ण योगदान रहेको गाउँपालिकाले जनाएको छ ।
त्यस्तै, स्वास्थ्य क्षेत्रलाई प्राथमिकतामा राख्दै आवश्यक मार्गदर्शन, सहयोग र अभिभावकीय भूमिका निर्वाह गर्ने गाउँपालिका अध्यक्ष ई. दीपेन्द्र सुनारी, उपाध्यक्ष, वडाध्यक्ष, कार्यपालिका सदस्य, जनप्रतिनिधि तथा गाउँपालिकामा कार्यरत सम्पूर्ण कर्मचारीहरूप्रति गाउँपालिकाले आभार व्यक्त गरेको छ ।
गाउँपालिकाले यो उपलब्धिलाई कुनै एक व्यक्ति वा संस्थाको मात्र नभई समग्र बुलिङटारको सामूहिक सफलता भएको जनाएको छ। आगामी दिनमा समेत स्वास्थ्य सेवाको पहुँच, गुणस्तर र प्रभावकारितालाई थप सुदृढ गर्दै नागरिकलाई सहज र भरपर्दो आधारभूत स्वास्थ्य सेवा उपलब्ध गराउने प्रतिबद्धता व्यक्त गरेको छ ।
