बुलिङटार, असोज १६ — नवलपरासी (बर्दघाट–सुस्ता पूर्व)को बुलिङटार गाउँपालिका–३ मा नवस्थापित आँखा उपचार केन्द्रको औपचारिक सेवा शुभारम्भ गरिएको छ ।
भरतपुर आँखा अस्पताल, नेपाल नेत्रज्योति संघ/हिरालाल सन्तुदेवी प्रधान नेत्र विज्ञान अध्ययन संस्थान र बुलिङटार गाउँपालिकाबीचको सहकार्यमा स्थापना गरिएको केन्द्रको एक समारोहबीच गाउँपालिका अध्यक्ष ई. दिपेन्द्र सुनारीले रिबन काटेर विधिवत् उद्घाटन गर्नुभएको हो ।
उद्घाटन समारोहलाई सम्बोधन गर्दै अध्यक्ष सुनारीले सामान्य आँखा जाँच तथा प्राथमिक उपचारका लागि गाउँपालिकावासीले समय र ठूलो खर्च गरेर भरतपुरसम्म पुग्नुपर्ने अवस्थालाई स्थानीयस्तरमै सेवा विस्तारले कम गर्दै लैजाने बताउनुभयो ।
उहाँले आफ्नै गाउँपालिकामा आँखा उपचार सेवा उपलब्ध हुनु नागरिकको स्वास्थ्य सेवामा पहुँच विस्तार गर्ने महत्वपूर्ण उपलब्धि भएको उल्लेख गर्दै स्थानीयस्तरमै स्वास्थ्य सेवा सहज, सुलभ र प्रभावकारी बनाउने प्रतिबद्धता व्यक्त गर्नुभयो ।
आँखा उपचार केन्द्र सञ्चालनमा आएसँगै बुलिङटार गाउँपालिका तथा आसपासका नागरिकले स्थानीयस्तरमै आँखा जाँच, परामर्श तथा प्राथमिक उपचार सेवा सहज रूपमा प्राप्त गर्न सक्ने भएका छन् ।
कार्यक्रममा बुलिङटार गाउँपालिकाका प्रमुख प्रशासकीय अधिकृत विष्णुबहादुर थापा, प्रशासन अधिकृत कृष्ण जोशी, वरिष्ठ लेखा अधिकृत रमेश केसी तथा बुलिङटार–३ का वडा अध्यक्ष विष्णुवीर जर्गा मगर लगायतको उपस्थिति रहेको थियो ।
नागरिकको स्वास्थ्य सेवामा पहुँच विस्तार गर्ने उद्देश्यले स्थापना गरिएको केन्द्र सञ्चालनमा सहयोग पुर्याउने भरतपुर आँखा अस्पताल परिवार, जनप्रतिनिधि, प्रमुख प्रशासकीय अधिकृत, स्वास्थ्य शाखा प्रमुख, कर्मचारी तथा सम्पूर्ण स्थानीयवासीप्रति गाउँपालिकाले धन्यवाद तथा आभार व्यक्त गरेको छ ।
