नवलपुर । धार्मिक तथा पर्यटकीय क्षेत्रको स्वच्छता, सुन्दरता र संरक्षण गर्ने उद्देश्यले श्री नवदुर्गा टोल विकास संस्थाको आयोजनामा मौलाकालिका मन्दिर जाने बाटो तथा मौलाकालिका केबलकार परिसरमा सरसफाइ कार्यक्रम सम्पन्न भएको छ ।
२०८३ साल कात्तिक १५ गते आइतबार बिहान ६ बजेदेखि सुरु भएको उक्त कार्यक्रममा स्थानीयवासी तथा टोल विकास संस्थाका पदाधिकारीहरूको सहभागिता रहेको थियो ।
कार्यक्रमअन्तर्गत मौलाकालिका मन्दिर जाने पैदलमार्ग, बाटो आसपासका क्षेत्र तथा केबलकार परिसरमा सरसफाइ गरिएको थियो। धार्मिक आस्थाको महत्वपूर्ण केन्द्रका रूपमा रहेको मौलाकालिका मन्दिरमा दैनिक रूपमा दर्शन तथा भ्रमणका लागि आउने भक्तजन र पर्यटकलाई स्वच्छ, सफा र सुन्दर वातावरण प्रदान गर्ने उद्देश्यले कार्यक्रम आयोजना गरिएको संस्थाले जनाएको छ ।
धार्मिक तथा पर्यटकीय स्थलको संरक्षण र प्रवर्द्धन गर्नु सबैको साझा दायित्व भएको भन्दै स्थानीयस्तरबाट सञ्चालन गरिने यस्ता सरसफाइ अभियानले वातावरणीय स्वच्छता कायम गर्नुका साथै सामाजिक एकता, सहकार्य र सामुदायिक जिम्मेवारीको भावना विकास गर्न महत्वपूर्ण भूमिका खेल्ने विश्वास गरिएको छ ।
