काठमाडौं, असार ७ । पूर्वसञ्चारकर्मी रवि लामिछानेले नयाँ पार्टीको घोषणा गरेका छन् । मंगलबार राजधानीमा आयोजित कार्यक्रममार्फत उनले ‘राष्ट्रिय स्वतन्त्र पार्टी’ गठनको घोषणा गरेका हुन् । लामिछानेले आज राजनीति यात्राको पहिलो पाइला भएको बताएका छन् ।
उनले आफ्नो पार्टी अन्य पुराना पार्टीहरुभन्दा फरक रहेको दाबी गरेका छन् । आजै निर्वाचन आयोगमा दल दर्ता गर्ने उनको भनाइ छ । उनले स्वतन्त्र रूपमा उम्मेदवारी घोषणा गर्नेहरूलाई आफ्नो पार्टीमा समावेश हुन पनि आग्रह गरे । उनले क्षमता भएकाहरू जसलाई पनि पार्टीमा स्वागत रहेको बताए ।
क्षमता नभई नभई पार्टीमा र्याल चुहाएर आफू नबस्ने बताए । ‘यो पार्टीमा रहेर आफ्नो क्षमता देखाउन सकिनँ भने जहाँ देख्यो त्यहाँ ढुंगाले हान्नुहोला,’ उनले भने, ‘क्षमता देखाउन नसके पार्टीमा र्याल सिँगान चुहाँउदै टाँस्सिएर बस्ने छैन ।’ देशभरिबाट समानुपातिक भोट सङ्कलन गर्नुपर्ने भएकोले पार्टी दर्ता गराएको उनको भनाइ छ ।
लामिछानेले राजनीतिको हिलो सफा गर्न आफू हिलोमा डुबुल्की मार्न आएको बताए । ‘राजनीतिमा कति हिलो–मैलो छ मलाई थाहा छ । यो राजनीतिको हिलो सफा गर्न म हिलोमा डुबुल्की मार्नुपर्छ ।’ उनले भने ‘मलाई हिलो लाग्छ तर तपाईंले म हिलोमै रहन्छु भन्ने नसोच्नुस् । हिलो सफा गरेर मात्र निस्कन्छु ।’
