बुटवल, असार १५ । लुम्बिनी प्रदेशकी स्वास्थ्य राज्यमन्त्री विमला खत्री वलीले पदबाट राजीनामा दिएकी छन् । उनले मुख्यमन्त्री कुलप्रसाद केसीलाई राजिनामा बुझाएकी हुन् ।
गत जेठ ३१ गते दाङका वाईसीएल नेता एकराज बस्नेतको घरमा गई उनकी श्रीमती र छोरीमाथि हातपात गरेको आरोपपछि उनी विवादमा तानिएकी थिइन् । सो प्रकरणमा उनी प्रहरी नियन्त्रणमासमेत परेकी थिइन् । उनी प्रहरी हिरासतमा रहदा बिरामी भएको भन्दै उपचारका लागि बुटवलस्थित लुम्बिनी प्रादेशिक अस्पतालमा भर्ना भएको थियो । बुटवलमा केही दिन बसेर दाङमा बस्दै आएकी वलीले अन्ततः सोमबार नै राजीनामा बुझाएका हुन् ।
बस्नेतको घरमा गएर उनकी श्रीमती र छोरीलाई हातपात गरेको विषयमा प्रदेश सरकारले छानबिन समिति समेत गठन गरेको थियो । छानबिन समितिको प्रतिवेदन आउनु अघिनै मन्त्री वलीले राजीनामा दिएकी हुन् ।
