काठमाडौँ, असार ३१ । प्रधानमन्त्री शेरबहादुर देउवाले राष्ट्र बैंकका गभर्नर महाप्रसाद अधिकारीले नैतिकताको आधारमा पदबाट राजीनामा दिनुपर्ने बताएका छन् । शुक्रबार बालुवाटारमा बसेको पाँच दलीय गठबन्धनको बैठकमा पनि नेताहरुले गभर्नरको राजनीतिक संलग्नता देखिएको विषय उठाएका थिए ।
‘बैठकमा सहभागी अन्य नेताहरूले पनि अधिकारीको राजीनामा माग्नु पर्ने बताउनु भएको थियो’ बैठकमा सहभागी एक नेताले भने, ‘प्रधानमन्त्री देउवाले भने गभर्नरको राजनीतिक संलग्नता देखिएको कारण अन्यले राजीनामा माग्ने नभइ अधिकारीले स्वयंले नैतिकताको आधारमा राजीनामा दिनुपर्ने बताउनु भएको थियो ।’
असार २६ मा एमालेले जारी गरेको अन्तर पार्टी निर्देशन (अपानी)मा अर्थ तथा योजना विभागको सदस्यमा खोटाङका एम अधिकारीको नाम रहेको छ । उक्त एम अधिकारी नामको व्यक्ति गभर्नर अधिकारी नै भएको समाचार सार्वजनिक भएसँगै उनको व्यापक आलोचना रराजीनामा माग हुँदै आएको छ ।
यद्यपि अधिकारी र एमालेले भने एम अधिकारी भनेको महाप्रसाद नभएको जनाएका छन् । एमालेले यस विषयमा आधिकारिक र तथ्यगत ढंगले खण्डन गरी अर्को एम अधिकारी देखाउन नसकेकाले गभर्नर अधिकारी नै एम अधिकारी रहेको शंका उत्पन्न भएको छ ।
