काठमाडौं । अर्थमन्त्री जनार्दन शर्माले कार्यभार सम्हालेका छन् । बजेट निर्माणका समयमा करका दर हेरफेर गरेको आरोप लागेपछि राजीनामा दिएका शर्मा शनिवार मन्त्रीमा पुनः नियुक्त भएका थिए ।
शर्मामाथि आरोप लागेपछि छानबिनका लागि संसदीय समिति नै गठन गरिएको थियो । समितिले १७ दिनसम्म छानबिन गरेपछि आरोप प्रमाणित नभएपछि उनी पुनः अर्थमन्त्री बनेका हुन् । समितिको प्रतिवेदनमाथि नेकपा एमालेले भने असहमति जनाउँदै आएको छ । समितिमा रहेका एमाले सांसदहरूले फरक मत राखेका थिए ।
प्रधानमन्त्री शेरबहादुर देउवाको सिफारिसमा राष्ट्रपति विद्यादेवी भण्डारीले शनिवार शर्मालाई मन्त्री नियुक्त गरेकी थिइन् । शर्माले राष्ट्रपति भण्डारीबाट शनिवार नै शपथ गरेका थिए ।
