काठमाडौं । नेपाल समाजवादी पार्टीको अध्यक्षमा डा. बाबुराम भट्टराई र महिन्द्र राय यादव चयन भएका छन् । शनिबार ललितपुरमा बसेको पार्टीको प्रथम पूर्ण बैठकले एक नम्बर वरीयताको अध्यक्षमा भट्टराईलाई र अर्को अध्यक्षमा यादवलाई चयन गरेको हो ।
त्यस्तै सहअध्यक्षमा तेस्रो वरीयतामा गंगानारायण श्रेष्ठ र उपाध्यक्षमा हिसिला यमि, भक्तबहादुर शाह र दुर्गा सोवलाई चयन गरिएको छ । पार्टीको महासचिवमा रमेशप्रसाद यादव चयन भएका छन् । बैठकले ९ जना केन्द्रीय कार्यकारिणी सदस्यहरूलाई प्रदेश इन्चार्ज पनि तोकेको छ ।
जसमा प्रदेश १ मा राजेन्द्र कुमार किराँती, मधेस प्रदेशमा देवेन्द्र यादव, वाग्मती प्रदेशमा अक्कलबहादुर थिङ, गण्डकी प्रदेशमा मोतिप्रसाद पंगाली, लुम्बिनी प्रदेशमा कमलप्रसाद खनाल, कर्णाली प्रदेशमा देवीबहादुर बुढाथोकी र सुदूरपश्चिम प्रदेशमा जनक शाह रहेका छन् ।
यस्तै गैर भौगोलिक विशेष प्रदेशमा ईश्वर रिजाल र प्रवास विशेष प्रदेशमा घमानसिं गुरुङ चयन भएका छन् । पार्टीको विधानमा व्यवस्था गरिएको संघीय परिषद् अध्यक्ष पद भने खाली राखेको छ ।
