नवलपुर । नवलपुर क्षेत्र नम्बर २ मा नेपाली कांग्रेसले नेकपा एमालेको तीन दशक लामो विरासत भत्काएको छ ।एमालेका तिलकबहादुर महत क्षेत्रीलाई पराजित गर्दै सत्ता गठबन्धनका तर्फबाट उम्मेदवार बनेका कांग्रेसका विष्णु कार्की प्रतिनिधिसभा सदस्यमा निर्वाचित भएका छन् ।
कार्की निर्वाचित भएसँगै कांग्रेसले एमालेको ३० वर्षे विरासत भत्काएको हो । प्रतिनिधिसभा सदस्यमा निर्वाचित कार्कीले ३६ हजार एक सय चार मत प्राप्त गर्दा एमालेका क्षेत्रीले ३४ हजार ८३ मत पाए ।
नवलपुर २ बाट २०४८ सालको निर्वाचनमा एमालेका उम्मेदवार मोजीलाल थनेत थारू निर्वाचित भएका थिए । त्यसैगरी २०५१ को मध्यावधि निर्वाचनमा एमालेका चन्द्रमणि खराल र २०५६ मा भएको आमनिर्वाचनमा एमालेका तर्फबाट पुनः मोजीलाल थनेत थारू निर्वाचित भएका थिए ।
पहिलो संविधानसभा सदस्यको निर्वाचन २०६४ मा एमाले तेस्रो शक्ति बन्दासमेत यो क्षेत्रबाट एमालेका उम्मेदवार कृष्णप्रसाद पौडेल निर्वाचित भएका थिए । २०७० को निर्वाचनमा एमालेका जीवन श्रेष्ठ र २०७४ मा एमालेका तिलकबहादुर महत क्षेत्री निर्वाचित भएका थिए । तर, यो पटक भने एमालेले यो क्षेत्रमा पराजय भोग्नु पर्यो ।
एमालेको तीन दशकभन्दा लामो विरासत भत्काउनु सानो उपलब्धि नभएको कांग्रेसका जिल्ला सभापति महेन्द्रध्वज जिसी बताउँछन् । ‘यो क्षेत्रमा एमालेको राम्रो प्रभाव छ । प्रदेशसभाका दुवै सिट एमालेले जित्दा पनि प्रतिनिधिसभा सदस्यमा हामीले जित हासिल गर्नु ठूलो उपलब्धि हो’, जिसीले भने, ‘यो जितलाई आगामी दिनमा कायम राख्न हामीलाई अझ बढी चुनौती थपिएको छ ।’
दुवै प्रदेशसभामा एमालेका उम्मेदवारले ठूलो मतान्तरले जित निकालेका छन् । प्रदेशमा जितेको पार्टी प्रतिनिधिसभा सदस्यमा हार्दा साङ्गठनिक रूपमा एमालेलाई धक्का लागेको पार्टीका जिल्ला अध्यक्ष रोशनबहादुर गाहा मगरले बताए । ‘पार्टीले नसोचेको निर्वाचन क्षेत्रमा हार व्यहोरेको छुु’, मगरले भने, ‘हामी यहाँ के कारणले हार्यौँ भन्ने विषयमा हामीले पार्टीको समीक्षा बैठकमा निर्णय गर्नेछौँ ।’
नवलपुर–२ मा अघिल्लो निर्वाचन २०७४ मा कार्की एक हजार तीन सय तीन मतले क्षेत्रीसँग पराजित भएका थिए । त्यसबेला एमालेका महतले ३९ हजार ५३ मत प्राप्त गर्दा कार्कीले ३७ हजार सात सय २० मत प्राप्त पाएका थिए ।
