बुलिङटार २३ माघ । नवलपुरको पहाडी भेग बुलिङटार गाउँपालिका वडा नं ३ भलायटारमा प्रथम बुलिङटार वडा अध्यक्ष कप भलिबल प्रतियोगिता, बृहत सांस्कृतिक कार्यक्रम तथा नि:शुल्क भलिबल जाली वितरण कार्यक्रम हुने भएको छ ।
बुलिङ भलायटार विकास समाजको आयोजना तथा बुलिङटार गाउँपालिका वडा नं ३ कार्यालयको समन्वयमा बुलिङटार ३ भलायटार झिल्के चौतारीमा हुने समाजका अध्यक्ष अर्जुन पुलामी मगरले जानकारी दिनुभएको छ । स्वास्थ्यका लागि खेलकुद, राष्ट्रका लागि खेलकुद भन्ने मूल नारालाई आत्मसाथ गर्दै माघ २५ गते बृहत सांस्कृतिक कार्यक्रम तथा नि:शुल्क भलिबल जाली वितरण गरिने र माघ २६ गते देखि भलिबल खेल प्रतियोगिता शुरु हुने अध्यक्ष पुलामी मगरले बताउनुभयो । अध्यक्ष पुलामीका अनुसार प्रतियोगितामा प्रथम हुनेलाई रु ५० हजार शिल्ड, मेडल र प्रमाणपत्र, द्वितीयलाई रु ३० हजार शिल्ड, मेडल र प्रमाणपत्र, तृतीयलाई रु १५ हजार शिल्ड, मेडल र प्रमाणपत्र र सान्त्वनालाई रु ५ हजार शिल्ड, मेडल र प्रमाणपत्र व्यवस्था गरिएको छ।
यस्तै बुलिङटार ३ का वडा अध्यक्ष विष्णु वीर जर्घा मगरले विभिन्न टोलहरुमा रहेका खेलाडीहरु बिचको सम्बन्धलाई प्रगाढ बनाउने उद्देश्यका साथ आउदै गरेको माघे औंसीको अवसरमा टोल स्तरीय खेलाडीहरु बीच मैत्रिपूर्ण प्रथम बुलिङटार वडाध्यक्ष कप भलिबल प्रतियोगिता आयोजनामा ३ नं वडा कार्यालयले समन्वय गरिएको बताउनुभयो ।
यस्तै बुलिङटार गाउँपालिका भित्रका भलिबल खेलमा सकृय टोलहरुलाई नि:शुल्क भलिबल र जाली समेत वितरण गरिने वडा अध्यक्ष जर्घा मगरले बताउनुभयो । नि:शुल्क भलिबल र जाली प्राप्तका लागि भने माघ २४ गते बेलुकी ५ बजे सम्म दर्ता गरिनुपर्ने समाजका सचिव तिलक झेंडी मगरले जानकारी दिनुभयो । माघ २५ गते वितरण गरिने भए तापनि खेलको टाइसित तथा बल जाली व्यवस्थापन गर्नु पर्ने भएकाले माघ २४ गते बेलुकी ५ बजेसम्म मात्र समय तोकिएको सचिव झेंडी मगरले बताउनुभयो । यस्तै माघ २५ गते बृहत सांस्कृतिक कार्यक्रममा भने राष्ट्रिय कलाकार अर्जुन सापकोटा, सुमन थापा, दिपक खड्का लगायत स्थानीय कलाकारहरुको बेजोड प्रस्तुति रहने आयोजक संस्थाले दिइएको छ। आयोजक संस्थाका अनुसार बल जाली भने बुलिङटार गाउँपालिका भित्रका भलिबल खेलमा सक्रिय टोल ले मात्रै पाउने छन् ।
