बुलिङटार २४ माघ । बुलिङटार गाउँपालिका र रोटरी क्लब अफ चितवनबीच “चम्घा-खसुवा सोलार लिफ्ट खानेपानी तथा सरसफाई योजना” सम्पन्न गर्ने सम्झौतामा हस्ताक्षर भएको छ ।
गाउँपालिका अध्यक्ष दिपेन्द्र सुनारी मगरले आफ्नै नेतृत्वमा जनताको जीवनस्तर सुधार्न र समृद्ध गाउँपालिका निर्माण गर्न महत्त्वपूर्ण योजनाहरू अगाडि बढाउनाको लागि सो काम गर्नुभएको हो ।
रोटरी क्लबका अध्यक्ष भानु शर्मा र बुलिङटार गाउँपालिकाको तर्फबाट अध्यक्ष दिपेन्द्र सुनारी मगरले सम्झौतामा हस्ताक्षर गर्नुभएको हो । यस योजनामा रोटरी क्लव अफ चितवनसँगै अन्तराष्ट्रिय संस्था (जापानिज टोली) को पनि आर्थिक सहयोग रहने अध्यक्ष सुनारी मगरले जानकारी गर्नुभएको दिनुभएको हो
यस योजनाले १८५ घरधुरीलाई “एक घर एक धारा” मार्फत स्वच्छ खानेपानी सेवा उपलब्ध गराउनुका साथै, राष्ट्रिय आधारभूत विद्यालय चम्घाका ८५ जना विद्यार्थीका लागि स्वच्छ पिउने पानी, हात धुने सुविधा र चर्पीको व्यवस्था गर्नेछ। सरसफाई र स्वस्थताका क्षेत्रमा जनचेतना जगाउनुका साथै खेर जाने पानीको उपयोगबाट करेसा बारी सिँचाइ गरी करिब १० रोपनी जग्गामा तरकारी खेती विस्तार गरिनेछ। यसले स्थानीय कृषिलाई प्रोत्साहन गर्दै आयआर्जनमा वृद्धि गर्ने लक्ष्य राखेको छ ।
करीब ५५ लाख रुपैयाँको अनुमानित बजेटमा सञ्चालन हुने यो योजनाले खानेपानी, कृषि, र सरसफाईमा सुधार ल्याउँदै स्थानीय जनताको जीवनस्तर उकास्न सहयोग पुर्याउनेछ।
अध्यक्ष दिपेन्द्र सुनारी मगरले दूरदृष्टि र प्रतिबद्धताका कारण बुलिङटार गाउँपालिकाले दिगो विकासका लागि थुप्रै सकारात्मक पहल गरिरहेको , जनताको आवश्यकता र समस्यालाई प्राथमिकतामा राखेर अघि बढाइएको यस्तो योजनाले बुलिङटारलाई “बस्न योग्य र हेर्न लायक समृद्ध बुलिङटार” बनाउने दिशामा थप मजबुत आधार तयार गरेको बताउनु भएको छ ।
