नवलपुर २९ भदाै । नवलपुरको हुप्सेकोट गाउँपालिका–६, प्लेगास्थित घाँगी भीरबाट लामो समयदेखि निरन्तर धुवाँको मुस्लो निस्किएपछि स्थानीयवासीमा त्राससँगै कौतूहल बढेको छ ।
प्लेगा गाउँबाट करिब ५०० मिटर दक्षिण–पश्चिमतर्फ रहेको घाँगी भीरबाट जमिनभित्रबाट धुवाँ निस्किरहेको स्थानीयले बताएका छन्। धुवाँसँगै बारुदजस्तो गन्धसमेत आउने गरेको उनीहरूको भनाइ छ ।
घटनाबारे जानकारी पाएपछि जिल्ला प्रहरी कार्यालय नवलपुरको टोलीले घटनास्थल पुगेर निरीक्षण गरिसकेको छ। प्रहरीका अनुसार जमिनभित्रबाट धुवाँ निस्किरहेको र केही गन्धसमेत महसुस भएको भए पनि धुवाँ निस्कनुको वास्तविक कारण भने अहिलेसम्म यकिन हुन सकेको छैन ।
धुवाँ निस्किएको घटनालाई लिएर स्थानीयस्तरमा विभिन्न अनुमान भइरहे पनि अहिले नै यसलाई ज्वालामुखी, ग्यास चुहावट वा विस्फोटसँग जोडेर निष्कर्ष निकाल्न नमिल्ने प्रहरीको भनाइ छ ।
घटनाको वास्तविक कारण पत्ता लगाउन भूगर्भ तथा सम्बन्धित प्राविधिकबाट स्थलगत अध्ययन तथा परीक्षण आवश्यक देखिएको छ। लामो समयदेखि धुवाँ निस्किरहेकाले सम्भावित जोखिमबारे समेत सम्बन्धित निकायले थप अध्ययन र निगरानी गर्नुपर्ने देखिन्छ ।
