बुलिङटार ०७ असोज । बुलिङटार गाउँपालिका–१ डाँडबेसीस्थित श्री अरुणोदय युवा क्लबले आफ्नो ३९औँ वार्षिक उत्सव विविध कार्यक्रमसहित आयोजना गर्ने भएको छ ।
“स्वास्थ्यका लागि खेलकुद, राष्ट्रका लागि खेलकुद” भन्ने नाराका साथ आयोजना हुने उत्सवमा वडा स्तरीय पुरुष तथा महिला भलिबल प्रतियोगितासँगै विभिन्न सांस्कृतिक कार्यक्रमसमेत सञ्चालन हुने क्लबले जनाएको छ ।
उत्सवअन्तर्गत २०८३ कात्तिक ४ गते सांस्कृतिक कार्यक्रम, कात्तिक ५ गते लोक दोहोरी धमाका तथा कात्तिक ६ गतेदेखि ८ गतेसम्म वडा स्तरीय पुरुष तथा महिला भलिबल प्रतियोगिता सञ्चालन हुनेछ। साथै बाइक स्लो रेस समेत आयोजना गरिनेछ ।
भलिबल प्रतियोगितामा पुरुषतर्फ प्रथम हुने टोलीले रु. १००,१११/- द्वितीयले रु. ५०,०५५/- र तृतीयले रु. २,५०२५/- सहित शिल्ड, मेडल र प्रमाणपत्र प्राप्त गर्नेछन्। महिलातर्फ प्रथमलाई रु. १०,००० र द्वितीयलाई रु. ५,००० पुरस्कारको व्यवस्था गरिएको छ। बाइक स्लो रेसका विजेताले रु. २,००० प्राप्त गर्नेछन् ।
प्रतियोगितामा सहभागी हुन पुरुष भलिबलतर्फ रु. ५,००० र महिला भलिबलतर्फ रु. १,००० प्रवेश शुल्क तोकिएको छ। बाइक स्लो रेसको प्रवेश शुल्क रु. २०० रहेको छ ।
क्लबका अनुसार टिम दर्ताको अन्तिम मिति कात्तिक ५ गतेसम्म रहेको छ। कार्यक्रम श्री अरुणोदय युवा क्लब खेलमैदान, डाँडबेसी, बुलिङटार–१, नवलपुरमा हुनेछ।
क्लबले वार्षिक उत्सवमार्फत खेलकुदको विकाससँगै स्थानीय कला, संस्कृति र युवाको सहभागितालाई प्रोत्साहन गर्ने उद्देश्य राखेको छ ।
