चितवन २५ असार। राप्ती नगरपालिका–३ निवासी सुजिता भण्डारीको मृत्युको घटनालाई सामान्यरुपमा लिन नहुने राप्ती नगरपालिकाकी मेयर प्रभा बरालले बताएकी छन् ।
प्रहरीले उक्त घटनाको छिटो अनुसन्धान गरी सत्यतथ्य पत्ता लगाई दोषीलाई कडा कारबाही हुनुपर्ने उनले बताइन् । सुजिता बेपत्ता भएदेखि नै खोजीका लागि नगरपालिकाले प्रहरी प्रशासनसँग समन्वय गर्दै आएको बताउँदै मेयर बरालले आइतबार साँझ मृत अवस्थामा सुजिताको शव जंगलमा फेला परेपछि सो घटनालाई गम्भीररुपमा अनुसन्धान गर्न सम्बन्धित निकायलाई ध्यानाकर्षण गराइरहेको उनले बताइन् ।
जिल्ला प्रहरी कार्यालय चितवनका प्रमुख एवम् प्रहरी उपरीक्षक ओमप्रकाश अधिकारीले सुजिता भण्डारीको मृत्यु घटनामा शंकास्पद रहेका एकसय बढी व्यक्तिसँग सोधपुछ गरिएको र सोधपुछका क्रममा केही कुरा खुलेको र त्यसका लागि थप अनुसन्धान भइरहेको जानकारी दिए ।
