नवलपुर । पुर्ब नवलपरासीको कावासोती नगरपालिकाले उत्कृष्ट कृषकलाई पुरस्कृत गर्ने भएको छ । कावासोती नगरपालिका कृषि तथा पशुपंक्षी विकास शाखाले एक सार्वजनिक सूचना जारी गर्दै उत्कृष्ट कृषक पुरस्कार कार्यक्रममा सहभागि हुन आह्वान गरेको छ ।
कावासोती नगरपालिकाको आर्थिक वर्ष २०७८÷०७९ को वार्षिक स्वीकृत कार्यक्रम अन्तरगत साना, मझौला तथा ठूला कृषक एक/एक जनालाई उत्कृष्ट कृषक पुरस्कार प्रदान गर्ने बताएको छ । यश कार्यक्रममा सहभागि हुनका लागि आह्वान गर्दै नगरपालिकाले आवश्यक मापदण्ड पुरा भएका कृषकलाई कागजात पेश गर्न आह्वान गरेको छ ।
उत्कृष्ट कृषक पुरस्कार कार्यक्रम सञ्चालन माप दण्ड, २०७८ अनुसार न्युनतम मापदण्ड पुरा भएका कृषकहरुले तोकिएको ढाँचामा निवेदन तयार गरि, कावासोती नगरपालिका कृषि तथा पशुपंक्षी विकास शाखामा आवश्यक कागजातसहित पेश गर्नुहुन सम्बन्धित सबैको जानकारीको लागि सुचना प्रकाशित गरेको छ । कृषकले उक्त कार्यक्रममा भाग लिन रित नपुगेका वा म्याद नाघी प्राप्त हुन आएका निवेदन उपर सहभागी नगर्ने व्यहोरासमेत सम्बन्धित सबैको लागि जानकारी गराएको छ ।
हिजो १६ गते सोमबारको मितिमा सूचना प्रकाशन गरी, सूचना प्रकाशन भएको मितिले १५ दिनभित्र आवश्यक कागजात पेश गर्न उल्लेख गरिएको छ । नगरपालिकाले कृषकलाई हौसला प्रदान गरेर कृषि कर्मको सम्मान गर्ने उद्देश्य सहित यो कार्यक्रम गर्न लागेको कृषि तथा पशुपंक्षी विकास शाखाका प्रमुख टेकराज पौडेलले यस अनलाईनलाई बताउनुभयो ।
अहिलेसम्म स्थानीय स्तरमा कृषकलाई पुरस्कृत गर्ने कार्यक्रमहरु बिरलै हुने गरेपनि नगरपालिकाले कृषक पुरस्कृत गर्ने कार्यक्रमलाई अघि बढाएको र यस कार्यक्रमले कृषकलाई हौसला मिल्ने र आफ्नो काममा अझै बढी लगनशील हुन सक्ने आशा छ । नगरपालिकाले कृषकलाई आवश्यक पर्ने विभिन्न सामाग्री अनुदानमा सहयोग गर्ने कार्यक्रमहरु गर्दै आइरहेको छ ।
