गोरखा, जेठ १८ । गोरखाको पालुङटारमा चितुवाको आक्रमणबाट तीन जना घाइते भएका छन् । मंगलबार साँझ ७ बजे पालुङटार नगरपालिका – ४ रानीटारमा स्थानीय दुई जनालाई चितुवाले आक्रमण गरेको थियो ।
चितुवाको आक्रमणबाट स्थानीय बासिन्दा घाइते भएको खबर प्राप्त हुनासाथ घटनास्थल पुगेका प्रहरीलाई पनि चितुवाले आक्रमण गरी घाइते बनाएको हो । प्रहरी सहायक हवल्दार सुनिल रायमाझी, पालुङटार ४ का ४४ वर्षीय केशरबहादुर नेपाली र १६ वर्षका अभिषेक भण्डारी आक्रमणबाट घाइते भएको प्रहरीले जनाएको छ ।
उनीहरूको स्थानीय स्वास्थ्य संस्थामै उपचार भई घर फर्केको र अवस्था सामान्य रहेको प्रहरीको भनाइ छ । जिल्ला वन कार्यालय र प्रहरी टोलीले आक्रमण गर्ने चितुवाको खोजी सुरू गरेका छन् । यस्तै इलाका प्रहरी कार्यालय पालुङटारले स्थानीयलाई साँझपख र रातका बेला सुरक्षित रूपमा बस्न आग्रह गरेको छ ।
चितुवा देख्नासाथ तुरुन्तै प्रहरीलाई खबर गर्नसमेत इलाका प्रहरी कार्यालयले स्थानीयलाई आग्रह गरेको छ ।
