काठमाडौं, जेठ २१ । काठमाडौंको जोरपाटीस्थित सर्वनाम शिक्षालयका होस्टेल वार्डेन रामजी बस्नेतले होस्टलमा बस्ने छात्राहरूमाथि यौन दुर्व्यवहार गरेको आरोप लागेको छ ।
होस्टलमा बस्ने ३ जना छात्रामाथि यौन दुर्व्यवहार गरेको भन्ने आरोप लागेपछि होस्टेल वार्डेनको खोजी भइरहेको प्रहरी वृत्त बौद्धका डीएसपी ढुण्डराज न्यौपानेले जानकारी दिए । आरोपित वार्डेन बस्नेत भने अहिले फरार रहेका छन् । पीडित भनिएका छात्राहरु ९ देखि १२ वर्ष उमेर समूहका रहेको प्रहरीले जनाएको छ ।
‘यौन दुर्व्यवहार भएको भन्ने छ । जाहेरी आइसकेको छैन,’ डीएसपी न्यौपानेले भने, ‘बलात्कार हो भन्ने कुराहरू पनि आइरहेका छन् । तर हामीले सोधपुछ गर्न पाइसकेका छैनौं ।’ पीडित छात्राका अभिभावक आज विद्यालयमा गएर उजुरी गरेपछि प्रहरीको टोली शिक्षालयमा पुगेको हो ।
महानगरीय प्रहरी वृत्त बौद्धले शिक्षालयका प्रिन्सिपल दुर्गानाथ सिवकोटी र उनकी श्रीमतीलाई सोधपुछका लागि नियन्त्रणमा लिएको छ ।
