बुटवल, जेठ २२ । रुपन्देहीको रोहिणी खोलामा बस दुर्घटना हुँदा मृत्युु भएका नौ जनामध्ये आठजनाको सनाखत भएको छ । मृतकमध्ये एक पुरुषबाहेक अरू आठजनाको सनाखत भएको हो ।
मृत्यु हुनेमा रूपन्देहीको तिलोत्तमा नगरपालिका–२, योगिकुटीका ५६ वर्षीय विष्णु पौडेल, तिलोत्तमा–८ की ३७ वर्षीया तुलसी पौडेल, बुटवल –११ कालिकानगरका ४८ वर्षीय कृष्णप्रसाद बस्याल, ओमसतिया गाउँपालिका–४ मटेरियाका राजेन्द्रप्रसाद पाण्डे, रौतहटका २० वर्षीय दिनेश दास र भारत घर भएका नागेन्द्र शर्मा, अरविन्द्र शर्मा र सञ्जय गुप्ता रहेको जिल्ला प्रहरी कार्यालय रुपन्देहीका प्रवक्ता प्रहरी नायब उपरीक्षक नवरत्न पौडेलले जानकारी दिए ।
बसमा दुई चालक र एक सहचालकसहित ३३ जना सवार थिए । तीमध्ये २५ पुरुष, ६ महिला र दुई बालिका थिए । घाइतेमध्ये १६ जनाको अवस्था गम्भीर छ । घाइते सबैको भैरहवास्थित युनिभर्सल कलेज अफ मेडिकल साइन्सेजमा उपचार भइरहेको छ । यसअघि भीम अस्पतालमा उपचाररत घाइतेलाई पनि अहिले मेडिकल कलेज ल्याइएको प्रहरीले जनाएको छ ।
आइतबार बिहान जनकपुरबाट भैरहवातर्फ आउँदै गरेको लु२ख ३८४१ नम्बरको बस रुपन्देहीस्थित रोहिणी खोलाको पुलबाट खसेको थियो ।
