बर्दिया, जेठ २४ । बर्दियामा प्रहरीले चलाएको गोली लागेर एक किशोरीको मृत्यु भएको छ । बाघ स्थानान्तरणको माग गर्दै मधुवन नगरपालिकास्थित ओराली बजारमा प्रदर्शनमा उत्रिएका स्थानीय र प्रहरीबीच झडप हुँदा प्रहरीले गोली चलाएको थियो ।
गोलीले लागेर मधुवन–२ की १८ वर्षीया नवीना थारूको मृत्यु भएको स्थानीय सीताराम थारूले जानकारी दिए । अर्का राकेश चौधरीको काखीमुनी गोली लागेर उपचार भइरहेको छ । सोमबार बारीमा दाउरा काट्दै गर्दा चितुवाले आक्रमणमा परी मधुवन–२ सोनाहाकी ४१ वर्षीया अस्मिता थारू घाइते भएकी थिइन् ।
त्यसपछि स्थानीयले वन्यजन्तुबाट सुरक्षाको माग गर्दै प्रदर्शन गरेका थिए । झडपमा स्थानीय र प्रहरीसहित २० जना घाइते भएको जिल्ला प्रहरी कार्यालय बर्दियाका प्रहरी निरीक्षक हृदय सापकोटाले जानकारी दिए ।
