काठमाडौं । अमेरिकी सेनाका एसिया–प्रशान्त क्षेत्र प्रमुख चार्ल्स ए फ्लिन नेपाल आएका छन्। चारदिने औपचारिक नेपाल भ्रमणका क्रममा फ्लिन इन्डियो एयरलाइन्सबाट नयाँदिल्ली हुँदै बिहीबार काठमाडौं आइपुगेका हुन्। नेपाल–अमेरिका कूटनीतिक सम्बन्धको ७५औं वर्षगाँठको अवसरमा नै उनको नेपाल भ्रमण भएको बताइएको छ।
वर्षगाँठकै अवसरमा प्रधानमन्त्री शेरबहादुर देउवा र प्रधानसेनापति शर्मा पनि असार अन्तिम साता अमेरिका भ्रमणको तयारी भइरहेको परराष्ट्र स्रोतले जनाएको छ। यद्यपि मिति भने टुंगिसकेको छैन। जर्नेल फ्लिन सन् २०२१ जुनदेखि एसिया–प्रशान्त क्षेत्र प्रमुखको रूपमा कार्यरत छन् । सैनिक प्रवक्ता नारायण सिलवालले अमेरिकी सेनाका एसिया–प्रशान्त क्षेत्र प्रमुख जर्नेल फ्लिनको भ्रमण सद्भावना भ्रमण मात्र रहेको बताएका छन्।
फ्लिनले शुक्रबार सैनिक मुख्यालय जंगी अड्डा भ्रमण गर्ने कार्यक्रम तय भएको छ। सैनिक मुख्यालयमा जर्नेल फ्लिनलाई नेपाली सेनाको एक टुकडीले सम्मान गर्नेछ। सम्मानपश्चात् प्रधानसेनापति शर्मा र जर्नेल फ्लिनले भेटवार्ता गर्ने कार्यक्रम छ।
परराष्ट्र मन्त्रालयका अनुसार जर्नेल फ्लिनले शनिबार माउन्टेन फ्लाइट गर्ने र सगरमाथा आधार शिविर जाने कार्यक्रम पनि रहेको छ। फ्लिनले आइतबार नेपाली सेनाको वीरेन्द्र शान्ति कार्य तालिम केन्द्र पाँचखालको अवलोकन गर्ने छन् । उनले राष्ट्रपति विद्यादेवी भण्डारी र प्रधानमन्त्री शेरबहादुर देउवासँग शिष्टाचार भेटवार्ता गर्ने कार्यक्रम राखिएको छ।
