धनगढी, जेठ २९ । भारतको मुम्बईबाट घर फर्किदै गरेका अछामका एक युवकको कैलालीमा मृत्यु भएको छ । मुम्बईबाट फर्कने क्रममा अछामको चौरपाटी गाउँपालिका–१ का अन्दाजी ३२ वर्षीय धनबहादुर शाहको मृत्यु भएको जिल्ला प्रहरी कार्यालय कैलालीले जनाएको हो ।
प्रहरीका अनुसार मृतक शाहको शव सेती प्रादेशिक अस्पतालमा राखिएको छ । प्रहरीले शाहसँगै घर फर्किरहेका तीन जनालाई पक्राउ गरिएको छ । शाहको मृत्यु शंकास्पद रहेको भन्दै आफन्तले अनुसन्धानको माग गरेका छन् । शाहका आफन्तले मुम्बईबाट फर्कदा उनीहरुले गरगहना र नगद चोरी गरी ल्याएको र भागवण्डामा कुरा नमिलेपछि हत्या गरेको दाबी गरेका छन् ।
प्रहरीले उक्त दाबीसहितको किटानी जाहेरी दर्ता गर्न अस्वीकार गरेको छन् । प्रहरीले शव परीक्षणपछि मात्र किटानी जाहेरी दर्ता गर्न सकिने बताएको छ । मुम्बईबाट फर्किएका उनीहरु जेठ २६ गते धनगढी बसपार्कस्थित होटलमा बसेका थिए । त्यहाँ शाह बिरामी भएपछि माया मेट्रो अस्पतालबाट औषधि ल्याएर खुवाएका थिए, भने २७ गते सेती प्रादेशिक अस्पतालमा भर्ना गरेका थिए ।
शाह ठीक भएपछि अछाम हिँडेका उनीहरु पछि फेरि शाह बेहोस् भएको भन्दै माया मेट्रो अस्पतालमा लगेका थिए । तर, अस्पतालले शाहलाई मृत घोषणा गरेको हो ।
