तनहुँ । तनहुँमा चितुवाको आक्रमणबाट एक बालकको ज्यान गएको छ । जिल्लाको बन्दीपुर गाउँपालिका–१ बोडिस्वाँराका प्रेम बगालेका ५ वर्षीय छोरा सुप्रिमको चितुवाको आक्रमणबाट ज्यान गएको हो ।
मंगलबार दिउँसो सवा ४ बजेतिर घरको आँगनमा खेलिरहेको अवस्थामा चितुवाले आक्रमण गरेको वडाध्यक्ष शिवकुमार श्रेष्ठले बताए । उनलेे भने ‘घरको आँगनमा दिदीभाई खेलिरहेको अवस्थामा चितुवाले आक्रमण गरेर लगेको हो । घरभन्दा दुई सय मिटर माथी छापेली सामुदायिक वनमा बालकको शव भेटिएको छ ।’
घटना घटेको आधा घण्टापछि बालकको शव भेटिएको हो । उक्त क्षेत्रमा शनिबार राती र आईतबार विहान पनि चितुवाको आक्रमणबाट दुई जना घाईते भएका थिए । बन्दीपुर–४ टावरमा शनिबार राती चितुवाको आक्रमण परी आठ वर्षीया बालिका रियाना थापा घाईते भएकी थिईन् । उनलाई घर नजिकैको बाटोमा चितुवाले आक्रमण गरेको थियो ।
यस्तै, आइतबार विहानपख बन्दीपुर गाउँपालिका–१ बाघदले शिखरडाँडामा चितुवाले आक्रमण गर्दा ३५ वर्षीय भीमलाल गरञ्जा घाइते भएका थिए । पिँढीमा सुतिरहेका बेला उनलाई चितुवाले आक्रमण थियो । स्थानीयका अनुसार सो क्षेत्रमा बच्चा सहितको चितुवाले आतंक मच्चाएको छ ।
बासस्थानका लागी ओडार, पानीको व्यवस्थासँगै जंगल नजिकै भएकाले चितुवा बेलाबेलामा देखा परेपनि अझैसम्म मान्छेलाई आक्रमण भने गरेको थिएन् । यसपाली चितुवा आतंक बढेपछि स्थानीयहरु निकै त्रसित छन् । चितुवालाई नियन्त्रणमा लिनका लागि आइतबार बाघदलेमा बाख्रा सहितको फलामे खोर राखिएको छ । तर चितुवा अझै नियन्त्रणमा आएको छैन ।
