रौतहट । जिल्ला कारागार कार्यालय रौतहटमा बन्दी जीवन विताई रहेका पुर्व मन्त्री मोहमद महताब आलमको विषयमा काठमाडौँबाट प्रकाशित हुने नयाँ पत्रिका दैनिकलाई जलाएर आलम समर्थकहरुले विरोध जनाएका छन् ।
नेकपा एमालेका नेता किरण साहको भनाइमा लागेर गलत समाचार प्रकाशन गरेको भन्दै आलमका समर्थकहरुले बुधवार सदरमुकाम गौरमा पत्रिका जलाएर विरोध गरेको हो । २०६४ साल चैत्र २७ गते पहिलो संविधान सभाको निर्वाचनको मतदानको पुर्व सन्ध्यामा राजपुर फरहदवामा भएको बम विस्फोटको घटनामा संलग्न रहेको आरोपमा आलम जिल्ला कारागार कार्यालयमा रहेका छन्
घटनाका मुख्य योजनाकार भनिएका पुर्व मन्त्री मोहमद आफताव आलम पनि कारागारमा बन्दी जीवन विताइरहेका छन् । जिल्ला कारागार कार्यालय गौरमा रहेका आलमलाई जेल भित्रै हत्या गराउने योजना बनाउदै गरेका एमाले नेता किरण साहको बारेमा लेख्नुको साटो नयाँ पत्रिकाले उल्टो समाचार सम्प्रेषण गरेर मानसिक तनाव दिएको भनाई आलम पक्षधरहरुको रहेको छ । किरण साहले आलमको हत्या गर्नको लागि कारागार भित्र रहेका छोटेलाल साहलाई सुपारी दिएको कुरो बाहिरिए पनि स्थानीय प्रसाशनले साहलाई नियन्त्रणमा लिएर कार्यवाही गर्न नसकेको आरोप लागेका छन् ।
अपराधिक षड्यन्त्र गर्ने साहलाई कानुनी कार्यवाही नगरिए स्थानीय प्रसाशनको विरुद्ध चर्को आन्दोलन गर्ने चेतावनी समेत दिएका छन् । कारागार भित्र पनि असुरक्षित रहेको र मेरो हत्याको योजना बनाउने किरण साह र छोटेलाल साह माथि कानुनी कार्यवाहीको माग गर्दै आलमले कारागारबाट नै जिल्ला प्रहरी कार्यालयमा दुवै जना माथि उजुरी दिएका छन् ।
घटनाको बारेमा अनुसन्धान भै रहेको जिल्ला प्रहरी कार्यालय रौतहटका प्रमुख प्रहरी उपरीक्षक विनोद घिमिरेले जनाएको छ ।
