काठमाडौं, असार ३ । नेपालले अमेरिकासँगको स्टेट पार्टनरसिप प्रोग्राम (एसपीपी) मा संलग्न हुन माग गर्दै पठाएको पत्रबारे छलफल गर्न संसदको अन्तर्राष्ट्रिय सम्बन्ध समितिको बैठक सुरु भएको ।
बुधबार तत्कालीन प्रधानसेनापती राजेन्द्र क्षेत्रीले अमेरिकी सरकारलाई लेखेको पत्र सार्वजनिक भएपछि त्यसबारे छलफल गर्न बैठक बोलाइएको थियो । बैठकमा परराष्ट्रमन्त्री नारायण खड्का, परराष्ट्र सचिव भरतराज पौड्याल र रक्षा सचिव किरणराज शर्मालाई बोलाइएको थियो । बैठकमा प्रधानसेनापति प्रभुराम शर्मा पनि उपस्थित छन् ।
अमेरिकालाई सेनाले पठाएको पत्र सार्वजनिक भएपछि सरकार र सेनाको आलोचना भइरहेको छ । प्रतिनिधिसभाका सदस्यहरूले यस विषयमा सदनलाई जानकारी गराउनुपर्ने माग गरिरहेका छन् । बुधबार मात्रै अमेरिकी दूतावासले एसपीपी सम्बन्धी कुनै सम्झौता पत्रमा हस्ताक्षर गर्नु नपर्ने र यसअघि नै नेपाल यसको अंग भइसकेको बताएको थियो ।
