गोरखा, असार ४ । गोरखामा आगलागीबाट एक वृद्धाको मृत्यु भएको छ । गएराति शहिदलखन गाउँपालिका – ७ स्थित तिवारी टोलको एक घरमा आगलागी हुँदा स्थानीय ६९ वर्षकी केशरीमाया वस्तीको मृत्यु भएको जिल्ला प्रहरी कार्यालय गोरखाका प्रहरी उपरीक्षक केदार खनालले जानकारी दिए ।
जलेर शरीरको तीन प्रतिशत भागमात्रै बाँकी रहेको खनालले बताए । उनका अनुसार घटना गएराति ११ देखि १२ बजेको बीचमा भएको आशंका छ । घटनाबारे शनिबार बिहान मात्रै थाहा भएको हो । प्रहरीलाई पनि बिहान साढे ७ बजे मात्रै खबर गरेको प्रहरी उपरीक्षक खनालले बताए ।
‘घर जंगलको बीचमा छ । त्यस घरलाई अन्य घरबाट नदेखिने रहेछ,’ प्रहरी उपरीक्षक खनालले भने ‘ग्यास लिक भएर आगलागी भएको जस्तो देखिन्छ । शरीरको ३ प्रतिशत भाग मात्रै बाँकी छ ।’ घरमा पनि पूर्ण रूपमा क्षति पुगेको प्रहरीले जनाएको छ ।
मृतक वस्ती सो घरमा एक्लै बस्दै आएका थिए । उनका छोरा नजिकै खाप्ली भन्ने ठाउँमा पसल थापेर बसेका छन् । बिहान उनी गाइ वस्तु हेर्न घर आएको बेलामा मात्रै घर जलेको अवस्थामा देखेको प्रहरी उपरीक्षक खनालले बताए ।
प्रहरीले वृद्धा महिलाको शवलाई पोष्टमर्टमको लागि जिल्ला अस्पताल गोरखा पठाइएको छ ।
