काठमाडौ, असार ९ । स्वास्थ्य मन्त्रालयले आजदेखि ५ वर्ष पुरा भई १२ वर्षमुनिका बालबालिकाहरूलाई कोभिड–१९ विरुद्धको फाइजर खोप दिँदैछ । बालबालिकालाई विद्यालयमा रहेको खोप केन्द्रमार्फत खोप लगाइने केन्द्रले जानकारी दिएको छ ।
२७ वटा जिल्ला बालबालिकालाई असार ९ गतेदेखि १५ गतेसम्म पहिलो मात्रा र श्रावण २ गतेदेखि ८ गतेसम्म दोस्रो मात्रा खोप दिइने छ । यस्तै बाँकी रहेका ५० वटा जिल्लामा भाद्र ५ देखि ११ गतेसम्म पहिलो मात्रा र सोही समूहलाई भाद्र २७ देखि असोज १ गतेसम्म दोस्रो मात्रा खोप दिइने राष्ट्रिय स्वास्थ्य शिक्षा, सूचना तथा सञ्चार केन्द्रले जानकारी दिएको हो ।
पहिलो चरणमा प्रदेश १ को झापा, इलाम, मोरङ, सुनसरी र मधेस प्रदेशको सप्तरी, धनुषा, पर्सा, सिरहा र महोत्तरीमा खोप लगाइनेछ । यस्तै बागमती प्रदेशको काठमाडौँ, ललितपुर, भक्तपुर, काभ्रे, चितवन, सिन्धुली र मकवानपुरमा खोप दिइनेछ भने गण्डकी प्रदेशको कास्की, नवलपरासी पूर्वमा खोप दिइने केन्द्रको भनाई छ ।
लुम्बिनी प्रदेशको नवलपरासी पश्चिम, रुपन्देही, बाके, दाङ, बर्दिया तथा कर्णाली प्रदेशको सुर्खेत र सुदूरपश्चिम प्रदेशको कैलाली, कञ्चनपुर र डडेलधुरामा खोप लगाइनेछ ।
