काठमाडौं, असार ९ । काठमाडौंको बूढानीलकण्ठ नगरपालिका–८, भंगालमा एक महिला मृत अवस्थामा फेला परेकी छिन् ।
बूढानीलकण्ठ–३ घर भएकी ४० वर्षीय फूलमाया सुनारको भंगालस्थित एक निर्माणाधीन घरमा शव फेला परेको र घटनाबारे अनुसन्धान जारी रहेको प्रहरी परिसर काठमाडौंका एसपी दिनेशराज मैनालीले जानकारी दिए । उनको हत्या भएको हुन सक्ने प्रहरीको आशंका छ ।
प्रहरीका अनुसार अनुसन्धानका लागि बागलुङका लक्ष्मीनारायण केसीलाई पक्राउ गरिएको छ । पक्राउ परेका केसी सोही निर्माणाधीन घरको चौकीदार हुन् । फूलमायाको शव हिजो मध्याह्न २ बजेतिर घरको भुइँतलामा भेटिएको थियो ।
उनी केही समयअघि सोही निर्माणाधीन घरमा काम गरेको र बीचमा छाडेर फेरि कामको खोजीमा हिजो नै त्यहाँ पुगेको बताइएको छ । उनको शव पोष्टमर्टमको लागि टिचिङ अस्पताल पठाएको प्रहरीले जनाएको छ ।
घटनाको अनुसन्धान जारी रहेको र पोस्टमार्टम रिपोर्ट आएपछि थप कुरा खुल्ने महानगरीय प्रहरी वृत्त महाराजगन्जका डीएसपी प्रमेश विष्टले बताए ।
